اسٹیٹ بینک آف پاکستان نے آئندہ دو ماہ کے لیے نئی مانیٹری پالیسی کا اعلان کرتے ہوئے شرح سود میں ایک فیصد یا 100 بیسز پوائنٹس کی کمی کر دی ہے۔ اس کمی کے بعد شرح سود 12 فیصد سے کم ہو کر 11 فیصد پر آگئی ہے، جو 6 مئی 2025ء سے نافذ العمل ہوگی۔ اسٹیٹ بینک کی زری پالیسی کمیٹی (ایم پی سی) کے جاری کردہ اعلامیے کے مطابق مہنگائی کی شرح میں مسلسل کمی اس فیصلے کا بنیادی سبب بنی ہے، جب کہ اپریل میں مہنگائی سالانہ بنیاد پر صرف 0.3 فیصد ریکارڈ کی گئی۔

زری پالیسی کمیٹی کے مطابق، مالی سال 2025ء کی دوسری سہ ماہی میں ملکی معیشت کی شرح نمو 1.7 فیصد رہی، جب کہ پورے مالی سال کے لیے جی ڈی پی کی مجموعی شرح نمو 2.5 سے 3.5 فیصد کے درمیان رہنے کی پیش گوئی کی گئی ہے۔ مارچ 2025ء میں کرنٹ اکاؤنٹ سرپلس 1.2 ارب ڈالر رہا، جب کہ بجلی کے نرخوں میں کمی اور غذائی اشیاء کی قیمتوں میں مسلسل کمی سے مہنگائی کے دباؤ میں واضح کمی آئی۔

اعلامیے میں مزید کہا گیا کہ اپریل کے دوران قوزی (core) مہنگائی میں بھی کمی دیکھی گئی جو طلب میں کمی اور سازگار اساسی اثرات کی عکاسی کرتی ہے۔ صارفین کی مہنگائی سے متعلق توقعات میں بہتری آئی ہے، توانائی اور گندم کی قیمتیں بھی کم ہوئی ہیں۔ تاہم، پیش گوئی کی گئی ہے کہ اگلے مہینوں میں مہنگائی میں قدرے اضافہ ہو سکتا ہے لیکن یہ 5 سے 7 فیصد کے درمیان رہے گی۔

ترسیلات زر ریکارڈ سطح پر پہنچ چکی ہیں، جب کہ اسٹیٹ بینک کو توقع ہے کہ ملکی زرمبادلہ کے ذخائر جون 2025ء تک 14 ارب ڈالر تک پہنچ جائیں گے۔ ایف بی آر کے ٹیکس محاصل میں 26.3 فیصد کا سالانہ اضافہ ریکارڈ کیا گیا ہے، تاہم یہ اب بھی مقررہ ہدف سے کم ہے۔ نجی شعبے کو قرضوں کی فراہمی میں 12.6 فیصد کا سالانہ اضافہ دیکھنے میں آیا ہے۔

کمیٹی نے عالمی تجارتی ٹیرف میں بڑھتی ہوئی غیر یقینی صورتحال اور بین الاقوامی سیاسی حالات کو معیشت کے لیے ممکنہ چیلنجز قرار دیا ہے۔ یاد رہے کہ اسٹیٹ بینک نے اس سے قبل 27 جنوری 2025ء کو بھی شرح سود میں ایک فیصد کی کمی کی تھی، جس کے بعد شرح سود 12 فیصد پر آ گئی تھی۔

پاکستان تحریک انصاف کے سینئر رہنما اور سابق وزیر خارجہ شاہ محمود قریشی نے پاک بھارت کشیدگی پر اظہار خیال کرتے ہوئے کہا ہے کہ پاکستان اور بھارت دونوں جوہری طاقتیں ہیں، اس لیے جنگ کسی بھی صورت میں باہمی خودکشی کے مترادف ہوگی۔ انہوں نے بھارت کے حالیہ اقدامات پر شدید تنقید کرتے ہوئے کہا کہ بھارت نے شملہ معاہدے کی روح اور متن دونوں کی خلاف ورزی کی ہے، اور سندھ طاس معاہدے کو معطل کرنا بین الاقوامی قوانین کی کھلی خلاف ورزی ہے۔

شاہ محمود قریشی کا کہنا تھا کہ بھارت سلامتی کونسل کی قراردادوں کو مسلسل نظر انداز کر رہا ہے، جو خطے کے امن کو خطرے میں ڈالنے کے مترادف ہے۔ انہوں نے اس بات پر بھی زور دیا کہ پاکستان کی جانب سے کی جانے والی غیر جانبدار اور شفاف بین الاقوامی تحقیقات کی پیشکش کو بھارت نے مسترد کر دیا، جو دراصل ایک فالس فلیگ آپریشن کا غیر اعلانیہ اعتراف ہے۔

اس سے قبل پاکستان تحریک انصاف کے بانی اور سابق وزیر اعظم عمران خان نے بھی مودی حکومت کی جنگی مہم جوئی اور خطے کے امن کو خطرے میں ڈالنے کی پالیسیوں کی شدید مذمت کی تھی۔ جیل میں وکلاء سے گفتگو کرتے ہوئے انہوں نے پہلگام واقعے میں انسانی جانوں کے ضیاع پر گہرے دکھ اور افسوس کا اظہار کرتے ہوئے متاثرین کے اہل خانہ سے تعزیت کی۔

عمران خان نے کہا کہ جیسے 2019ء میں پلوامہ واقعے کے بعد پاکستان نے بھارت کو ہر ممکن تعاون کی پیشکش کی تھی، اسی طرح اب بھی پاکستان نے سنجیدہ تحقیقات کی بات کی، لیکن بھارت ایک بار پھر ثبوت پیش کرنے میں ناکام رہا اور الزام تراشی پر اتر آیا۔ ان کا کہنا تھا کہ بھارت کی یہ پرانی روش ہے کہ داخلی ناکامیوں سے توجہ ہٹانے کے لیے پاکستان کو نشانہ بنایا جائے۔

انہوں نے کہا کہ بھارت ایک ارب پچاس کروڑ آبادی کا ملک ہے اور اسے اپنی جوہری ذمہ داریوں کا ادراک ہونا چاہیے، اس خطے کو عالمی سطح پر پہلے ہی نیوکلیئر فلیش پوائنٹ کے طور پر دیکھا جاتا ہے، ایسے میں اشتعال انگیزی کسی کے مفاد میں نہیں۔ عمران خان نے زور دیا کہ امن پاکستان کی اولین ترجیح ہے، مگر اسے ہرگز بزدلی نہ سمجھا جائے، پاکستان کے پاس بھارتی جارحیت کا جواب دینے کی پوری صلاحیت موجود ہے، جیسا کہ 2019ء میں ان کی حکومت نے پوری قوم کے اتحاد سے ثابت کیا۔