معروف سینئر اداکار توقیر ناصر نے نجی ٹی وی کے ایک پروگرام میں گفتگو کرتے ہوئے موجودہ شوبز انڈسٹری کے رجحانات پر شدید تنقید کی ہے۔ ان کا کہنا تھا کہ آج کے ڈراموں میں خلوص، سچائی اور جذبات کے بجائے صرف ظاہری خوبصورتی اور دکھاوے کو اہمیت دی جا رہی ہے۔ انہوں نے ماضی کے فنکاروں کا حوالہ دیتے ہوئے کہا کہ وہ اپنے کرداروں سے جذباتی طور پر جُڑے ہوتے تھے اور ان کی اداکاری میں قدرتی انداز اور سچائی نمایاں ہوتی تھی۔

توقیر ناصر نے موجودہ دور کی اداکاراؤں میں بڑھتے ہوئے پلاسٹک سرجری کے رجحان پر بھی افسوس کا اظہار کیا اور کہا کہ مصنوعی حسن نے ان کے چہروں کو بناوٹی بنا دیا ہے، جبکہ پرانی اداکارائیں سادگی پسند اور قدرتی خوبصورتی کی مالک ہوتی تھیں۔ انہوں نے ہدایتکاروں کے کام کے انداز پر بھی سوال اٹھائے اور کہا کہ پہلے ڈائریکٹرز سیٹ پر موجود رہتے اور فنکاروں کی کردار میں ڈھلنے میں رہنمائی کرتے تھے، مگر آج کل صرف مانیٹر پر بیٹھ کر کام چلایا جا رہا ہے جس سے اداکاری کا معیار متاثر ہو رہا ہے۔

پی ٹی آئی نے آج جی ٹی روڈ پر بڑے پاور شو کا اعلان کر دیا ہے جس کی قیادت وزیراعلیٰ خیبرپختونخواہ علی امین گنڈاپور کریں گے۔ اس سلسلے میں پارٹی کی سیاسی حکمت عملی پر مشاورت کے لیے مشترکہ پارلیمانی پارٹی کا اہم اجلاس کے پی ہاؤس اسلام آباد میں طلب کیا گیا ہے، جس میں قومی اور صوبائی اسمبلی کے تمام منتخب اراکین کو مدعو کیا گیا ہے۔ اجلاس میں تحریک انصاف کی جاری احتجاجی تحریک کے اگلے مرحلے پر تفصیلی غور کیا جائے گا، جبکہ احتجاج کو مزید مؤثر بنانے کے لیے اراکین سے تجاویز بھی لی جائیں گی۔

ذرائع کے مطابق خیبرپختونخواہ کے اعلیٰ رہنما خیبر ہاؤس اسلام آباد میں جمع ہو چکے ہیں جہاں قافلے کی لاہور روانگی کے لیے تیاریوں کو حتمی شکل دی گئی۔ علی امین گنڈاپور کی قیادت میں قافلہ لاہور روانہ ہوگا جہاں سیاسی ملاقاتوں اور مشاورتی اجلاسوں کا سلسلہ شروع ہوگا۔ وزیراعلیٰ خیبرپختونخواہ لاہور میں اپوزیشن لیڈر پنجاب اسمبلی ملک احمد خان بھچر سمیت پی ٹی آئی کے سینئر رہنماؤں اور اراکین پنجاب اسمبلی سے ملاقات کریں گے۔ ان ملاقاتوں کا مقصد عمران خان کی قیادت میں جاری تحریک کو مزید منظم کرنا اور آئندہ کی حکمت عملی کو واضح کرنا ہے۔ لاہور میں علی امین گنڈاپور کے اعزاز میں ایک خصوصی عشائیہ بھی دیا جائے گا جس میں تحریک کی سرگرمیوں پر تفصیلی مشاورت کی جائے گی۔