راولپنڈی: افواجِ پاکستان نے اب تک بھارت کی جانب سے بھیجے گئے 25 اسرائیلی ساختہ “ہیروپ” ڈرونز کو کامیابی سے مار گرایا ہے۔ ڈی جی آئی ایس پی آر لیفٹیننٹ جنرل احمد شریف چوہدری نے پریس بریفنگ میں بتایا کہ بھارت کی حالیہ جارحیت کے بعد پاکستان کے مختلف علاقوں میں یہ جدید خودکش ڈرونز بھیجے جا رہے ہیں جنہیں پاک فوج نے بروقت اور مؤثر کارروائیوں سے تباہ کیا۔

انہوں نے بتایا کہ 6 اور 7 مئی کو بھارت کی کھلی جارحیت کے دوران پاکستان نے نہ صرف دشمن کے 5 جدید جنگی طیارے اور متعدد چیک پوسٹس تباہ کیں بلکہ اس کے ڈرون حملوں کا بھی مؤثر جواب دیا۔ اب تک لاہور، راولپنڈی، چکوال، گوجرانوالہ، اٹک، بہاولپور، کراچی، چھور اور سندھ کے میانو علاقے سمیت 12 مقامات پر ڈرونز مار گرائے گئے۔

ڈی جی آئی ایس پی آر کے مطابق لاہور میں ڈرون گرنے سے پاک فوج کے 4 اہلکار زخمی ہوئے، جبکہ میانو سندھ میں ایک سویلین شہید اور دو شہری زخمی ہوئے۔ انہوں نے کہا کہ بھارت کی یہ حرکتیں اس کی بوکھلاہٹ کی علامت ہیں اور پاکستان کی افواج ان تمام حملوں کا نہ صرف جواب دے رہی ہیں بلکہ دشمن کے عزائم کو بھی ناکام بنا رہی ہیں۔

لیفٹیننٹ جنرل احمد شریف چوہدری نے کہا کہ یہ صورتحال انتہائی سنگین ہے اور پوری دنیا دیکھ رہی ہے کہ بھارت خطے اور عالمی امن کو داؤ پر لگا رہا ہے۔ انہوں نے واضح کیا کہ پاکستان اس قسم کی جارحیت کا بھرپور مقابلہ کرنے کی صلاحیت اور عزم رکھتا ہے۔

کراچی: بھارت کے ساتھ بڑھتی ہوئی کشیدگی کے پیش نظر اسٹیٹ بینک آف پاکستان نے تمام بینکوں کو ڈالر کے اخراج پر کڑی نظر رکھنے کی ہدایت جاری کی ہے، کیونکہ تنازع شدت اختیار کرنے کی صورت میں ڈالر کی طلب میں اچانک اضافہ ہو سکتا ہے۔

اسٹیٹ بینک کی اس ہدایت کے باوجود انٹر بینک اور اوپن مارکیٹ میں کرنسی ڈیلرز کا کہنا ہے کہ تاحال ڈالر کی طلب میں کسی قسم کی غیر معمولی تیزی دیکھنے میں نہیں آئی۔ مارکیٹ دن بھر پرسکون رہی اور کوئی افراتفری نہیں دیکھی گئی۔

کرنسی ڈیلرز کا کہنا ہے کہ پاکستان میں 90 فیصد سے زیادہ ترسیلات زر بھارتی ایکسچینج کمپنیوں کے ذریعے آتی ہیں، خاص طور پر مشرق وسطیٰ سے۔ اگر کشیدگی مکمل جنگ میں بدلتی ہے تو یہ کمپنیاں پاکستان پر دباؤ ڈالنے کا ایک ذریعہ بن سکتی ہیں۔ ان کمپنیوں کے یورپ، امریکا اور خلیجی ممالک میں مضبوط نیٹ ورک موجود ہیں، جو وہاں موجود پاکستانیوں سے مقامی کرنسی میں رقوم لے کر بینکنگ چینلز کے ذریعے پاکستان ڈالر منتقل کرتی ہیں۔ اسٹیٹ بینک ان کمپنیوں کو فی ڈالر 15 سے 20 روپے کی ترسیلی فیس ادا کرتا ہے۔

ماہرین نے خبردار کیا ہے کہ اگر صورتحال طویل جنگ میں تبدیل ہوئی تو یہ پاکستان کی کمزور معیشت کے لیے سخت نقصان دہ ہوگا، جب کہ بھارت بھی اقتصادی اعتبار سے بری طرح متاثر ہو سکتا ہے۔

بینکنگ ذرائع کے مطابق اسٹیٹ بینک نے غیر رسمی طور پر بینکوں کو آگاہ کیا ہے کہ موجودہ صورتحال میں ڈالر کی نقل و حرکت پر سخت نگرانی کی جائے۔ تاہم مارکیٹ میں ڈالر کی قدر، روپیہ کی قیمت اور بانڈز میں مجموعی طور پر زیادہ اتار چڑھاؤ نہیں دیکھا گیا۔

ایکسچینج کمپنیز ایسوسی ایشن آف پاکستان کے جنرل سیکرٹری ظفر پراچہ کا کہنا تھا کہ اوپن مارکیٹ میں ڈالر کی طلب معمول کے مطابق رہی، اور اگر ضرورت پڑی تو اس سے نمٹنے کی صلاحیت موجود ہے، لیکن طویل تنازع سے دونوں ممالک کی معیشت متاثر ہو سکتی ہے۔

ٹریس مارک کے سی ای او کے مطابق، مارکیٹ نے تاحال غیر یقینی صورتحال کو نظرانداز کیا ہے، اور جب تک کشیدگی میں مزید اضافہ نہیں ہوتا، اس کے طویل المدتی اثرات محدود رہنے کا امکان ہے۔