گوگل نے رواں برس کے اختتام تک پاکستان سمیت ایشیائی مارکیٹوں میں اپنی معروف فیچر “اے آئی اوورویوز” میں اشتہارات شامل کرنے کا اعلان کر دیا ہے۔ اس نئے اقدام کا مقصد کاروباری اداروں کو گوگل سرچ میں مصنوعی ذہانت کی مدد سے تیار کردہ جوابات کے ذریعے صارفین سے براہ راست رابطہ قائم کرنے کے مواقع فراہم کرنا ہے۔ یہ فیچر دنیا بھر میں 1.5 ارب سے زائد صارفین استعمال کر رہے ہیں اور خاص طور پر تجارتی نوعیت کے سوالات میں اس کی مقبولیت میں نمایاں اضافہ ہوا ہے۔ گوگل کی جانب سے یہ اشتہارات اب ان AI خلاصوں (Overviews) کا حصہ ہوں گے جو صارفین کی تلاش کے سیاق و سباق کو سمجھ کر متعلقہ معلومات فراہم کرتے ہیں۔ پاکستان میں کاروبار اب ان خلاصوں کے ذریعے صارفین کی توجہ حاصل کر سکیں گے اور ان کی فیصلہ سازی میں مؤثر کردار ادا کر سکیں گے۔

گوگل نے اس AI اشتہاری فیچر کے ساتھ کئی جدید ٹولز بھی متعارف کرانے کا اعلان کیا ہے، جن میں ایڈز اسٹوڈیو، اے آئی میکس فار سرچ، یوٹیوب کریئیٹر پارٹنرشپ حب، اور ایجنٹک اے آئی شامل ہیں۔ یہ ٹولز مارکیٹرز کو جدید ترین ٹیکنالوجی کے ذریعے اپنے کاروبار کو زیادہ مؤثر، خودکار اور ذاتی نوعیت میں پیش کرنے کی سہولت دیں گے۔ گوگل کا کہنا ہے کہ یہ تبدیلیاں ڈیجیٹل مارکیٹنگ کے مستقبل کی سمت میں ایک بڑا قدم ہیں، جہاں صارفین کے پیچیدہ سوالات کا جواب دینا اور ان کے سفر کو سادہ بنانا بنیادی مقصد ہے۔ گوگل ساؤتھ ایشیا کی نائب صدر سپنا چڈھا کے مطابق گوگل کئی سالوں سے AI پر مبنی اشتہارات میں صفِ اول پر رہا ہے اور اب وہ مارکیٹرز کو زیادہ ذہین اور بہتر نتائج دینے والے اوزار فراہم کر رہا ہے۔

گوگل جی میل کے صارفین کے لیے ایک جدید اور کارآمد اے آئی فیچر متعارف کرایا ہے، جو اب جی میل کے ویب ورژن پر بھی دستیاب ہے۔ اس نئے فیچر کے ذریعے طویل ای میل تھریڈز کی خودکار سمری ایک کلک پر نمایاں طور پر گوگل جی میل کے اوپر ظاہر ہوگی، جس سے صارفین کو اہم معلومات تک فوری اور آسان رسائی حاصل ہو سکے گی۔

یہ فیچر گوگل نے مئی 2025 میں سب سے پہلے آئی او ایس اور اینڈرائیڈ صارفین کے لیے متعارف کرایا تھا، اور اس کی کامیابی کے بعد اب اسے ویب صارفین تک بھی توسیع دی گئی ہے۔ گوگل کا اے آئی اسسٹنٹ طویل گفتگو میں موجود مختلف پیغامات کے بنیادی نکات کو ایک جامع خلاصے کی صورت میں سمیٹ کر پیش کرے گا، جس سے وقت کی بچت اور ای میل کا بہتر تجزیہ ممکن ہو گا۔

سب سے دلچسپ بات یہ ہے کہ یہ سمری وقت کے ساتھ خودکار طور پر اپ ڈیٹ ہوتی رہے گی، جیسے ہی نئے پیغامات شامل کیے جائیں گے۔ اس کے علاوہ، گوگل نے اپنے اے آئی سسٹم “جیمینائی” میں سائیڈ پینل کی سہولت بھی متعارف کرائی ہے، جس کی مدد سے صارفین کسی بھی ای میل کا خلاصہ صرف ایک کلک میں حاصل کر سکتے ہیں۔ گوگل کی یہ پیش رفت جی میل کو مزید اسمارٹ اور صارف دوست بنانے کی جانب ایک بڑا قدم ہے۔