سابق وزیراعظم عمران خان اور ان کی اہلیہ بشریٰ بی بی نے القادر ٹرسٹ کیس میں اپنی سزا معطلی کے لیے اسلام آباد ہائیکورٹ میں جلد سماعت کی متفرق درخواستیں دائر کر دی ہیں، جس پر عدالت نے ڈائری نمبر الاٹ کر دیا ہے۔ عمران خان کیس میں 26 جون کو آخری سماعت ہوئی تھی، جس کے بعد کیس مقرر نہیں کیا گیا۔ دائر کردہ درخواستوں میں مؤقف اپنایا گیا ہے کہ 17 جنوری کو سزا سنائی گئی تھی اور 27 جنوری کو اپیل دائر کی گئی، لیکن 15 مئی کو پہلی سماعت کے بعد نیب کی جانب سے بار بار التوا مانگا گیا۔ درخواست گزاروں کے وکیل بیرسٹر سلمان صفدر نے مؤقف اختیار کیا ہے کہ عدالت کی یقین دہانی کے باوجود درخواستیں اب تک مقرر نہیں ہوئیں، لہٰذا عدالت ان کی جلد سماعت کا حکم دے۔ اسلام آباد ہائیکورٹ میں یکم جولائی سے 30 اگست تک موسم گرما کی تعطیلات کا اعلان کیا جا چکا ہے، تاہم ضمانت کے کیسز سنے جائیں گے۔ بینچ میں شامل دونوں ججز تاحال دستیاب ہیں، اور اگر وہ رخصت پر چلے بھی گئے تو متبادل بینچ تشکیل دینے کا امکان موجود ہے، جس سے یہ اُمید کی جا رہی ہے کہ سزا معطلی کی درخواستوں پر جلد سماعت ممکن ہو سکتی ہے۔

حکومت نے ملک بھر میں ہنڈی، بھکاری اور جعلی ادویات مافیا کے خلاف کریک ڈاؤن کا فیصلہ کر لیا ہے، جس کے لیے وفاقی تحقیقاتی ادارے (ایف آئی اے) کو فوری اقدامات کی ہدایات جاری کر دی گئی ہیں۔ وفاقی حکومت وزیر داخلہ محسن نقوی نے ایف آئی اے کراچی زون کے دورے کے دوران ادارے کے افسران کو ہدایت دی کہ حوالہ ہنڈی میں ملوث بااثر عناصر کو بے نقاب کر کے ان کے خلاف بلا امتیاز کارروائی کی جائے۔ اجلاس میں ایف آئی اے کراچی زون کی کارکردگی اور مسائل پر تفصیلی بریفنگ دی گئی، جس میں ڈائریکٹر نعمان صدیق اور دیگر اعلیٰ حکام شریک تھے۔ وزیر داخلہ نے کہا کہ بھکاری مافیا ملک کی بدنامی کا سبب بن رہا ہے، لہٰذا ایسے ایجنٹس کو فوری گرفتار کیا جائے، اور ڈی پورٹ ہو کر واپس آنے والے افراد کی نگرانی اور گرفتاری کو بھی یقینی بنایا جائے۔ انہوں نے ہدایت دی کہ نان کسٹم اشیاء کے خلاف کارروائی کو تیز کیا جائے اور بیرون ملک 5 ہزار ڈالر سے زائد لے جانے والے مسافروں کے خلاف قانون کے مطابق سخت کارروائی کی جائے۔ اس موقع پر محسن نقوی نے جعلی ادویات کے مکروہ دھندے کو بھی سختی سے روکنے کا حکم دیا اور کہا کہ اس جرم میں ملوث افراد کی جگہ جیل ہے، ان کے خلاف آہنی ہاتھوں سے نمٹا جائے۔