لاہور: پاک بھارت کشیدہ صورتحال کے پیش نظر حکومت پنجاب نے صوبے بھر کے تمام تعلیمی ادارے 9 اور 10 مئی کو بند رکھنے کا اعلان کر دیا ہے۔ وزیر تعلیم پنجاب رانا سکندر حیات کے مطابق سکیورٹی خدشات اور ہنگامی حالات کے پیش نظر یہ فیصلہ کیا گیا ہے۔

وزیر تعلیم نے بتایا کہ اس فیصلے کا اطلاق تمام سرکاری و نجی اسکولوں، کالجز اور جامعات پر ہوگا۔ ساتھ ہی، انٹرمیڈیٹ کے جاری امتحانات اور 9 و 10 مئی کے پریکٹیکل بھی ملتوی کر دیے گئے ہیں، جن کا نیا شیڈول جلد جاری کیا جائے گا۔ البتہ او لیول اور اے لیول کے امتحانات اپنے شیڈول کے مطابق جاری رہیں گے۔

مزید برآں، صوبے بھر میں شہری دفاع اور ریسکیو 1122 کی فرضی مشقیں بھی شروع کر دی گئی ہیں۔ لاہور، راولپنڈی، ملتان، گوجرانوالہ، سیالکوٹ، اور دیگر شہروں میں سول ڈیفنس کی ٹیمیں ہنگامی حالات سے نمٹنے کی تیاریوں میں مصروف ہیں۔

ڈی جی پی آر آفس میں 24 گھنٹے فعال کنٹرول روم قائم کر دیا گیا ہے تاکہ عوام تک درست اور مستند معلومات پہنچائی جا سکیں اور افواہوں یا غلط خبروں کی روک تھام کی جا سکے۔

دوسری جانب لاہور پولیس نے بھی شہر میں فرضی مشقوں کا آغاز کر دیا ہے، جن میں دہشت گردی کے کسی ممکنہ حملے کی صورت میں فوری ردعمل کا مظاہرہ کیا گیا۔ ان مشقوں میں پولیس کے تمام ونگز، ریسکیو 1122 اور بم ڈسپوزل اسکواڈ نے حصہ لیا۔

اسلام آباد: وزیراعظم شہباز شریف کی زیر صدارت اعلیٰ سطحی سکیورٹی اجلاس میں فیصلہ کیا گیا ہے کہ بھارت کی جانب سے جاری اشتعال انگیزی کا منہ توڑ جواب دیا جائے گا اور جوابی کارروائیاں بلا تعطل جاری رکھی جائیں گی۔ اجلاس میں واضح کیا گیا کہ ڈرون حملوں میں شہید ہونے والے ہر پاکستانی کے خون کا حساب لیا جائے گا۔

اجلاس میں سکیورٹی حکام کی جانب سے بھارتی حملوں اور پاکستان کی جوابی کارروائیوں پر تفصیلی بریفنگ دی گئی۔ شرکاء کو بتایا گیا کہ افواج پاکستان نے اب تک بھارت کے 25 اسرائیلی ساخت کے ہیروپ ڈرونز مار گرائے ہیں، جن میں سے متعدد پاکستانی علاقوں میں گرے اور ان کا ملبہ قبضے میں لے لیا گیا ہے۔

وزیراعظم نے کہا کہ پاکستان اپنی خودمختاری اور سالمیت پر کوئی سمجھوتہ نہیں کرے گا، اور دشمن کے عزائم خاک میں ملا دیے جائیں گے۔ انہوں نے پاک فوج کی صلاحیتوں کو سراہتے ہوئے کہا کہ پوری قوم اپنی مسلح افواج کے ساتھ کھڑی ہے۔

آئی ایس پی آر کے مطابق، بھارت نے 6 اور 7 مئی کی درمیانی شب جدید ڈرونز اور جنگی طیاروں کے ذریعے بزدلانہ حملہ کیا، جس میں کئی بھارتی طیارے اور فوجی تنصیبات بھی تباہ ہوئیں۔ لائن آف کنٹرول پر بھی دشمن کو بھاری نقصان پہنچایا گیا۔

افواج پاکستان کی جانب سے جاری ردعمل میں تکنیکی (سافٹ کِل) اور مسلح (ہارڈ کِل) دونوں طریقوں سے دشمن کی پیش قدمی کو روکا جا رہا ہے۔ حکام کے مطابق بھارت کی بوکھلاہٹ اب بھی جاری ہے، مگر پاکستان ہر سطح پر تیار ہے اور دشمن کو سخت پیغام دے چکا ہے کہ اس قسم کی جارحیت کا منہ توڑ جواب دیا جائے گا۔