اسلام آباد:
پاکستان میں سوشل میڈیا پلیٹ فارم ’ایکس‘ (سابقہ ٹوئٹر) کی سروسز فروری 2024 میں پابندی کے بعد ایک سال سے زائد عرصے بعد بحال کر دی گئی ہیں۔

یہ فیصلہ موجودہ جنگی حالات اور بھارت کے ساتھ کشیدگی کے تناظر میں بیانیے کی جنگ میں مؤثر شرکت کے لیے کیا گیا۔

بدھ کے روز سینیٹ کی قائمہ کمیٹی برائے آئی ٹی کا اجلاس چیئرپرسن پلوشہ خان کی صدارت میں ہوا، جہاں چیئرمین پی ٹی اے نے “ایکس” کی بحالی کی تصدیق کی۔ پلوشہ خان نے کہا کہ ایکس کی سروسز رات کے وقت پاکستان میں بحال کر دی گئی ہیں۔

اجلاس میں کمیٹی اراکین نے بھارتی حملے کی شدید مذمت کی اور پاک فوج اور فضائیہ کو بھرپور خراجِ تحسین پیش کیا۔ پلوشہ خان نے کہا کہ بھارت نے ایک بار پھر بزدلی کا مظاہرہ کرتے ہوئے سویلین آبادی کو نشانہ بنایا، جس کا پاکستان نے منہ توڑ جواب دیا ہے۔

یاد رہے کہ “ایکس” پر پابندی ملک میں سیاسی کشیدگی، جھوٹی اطلاعات اور حساس مواد کی روک تھام کے لیے لگائی گئی تھی۔ اس وقت حکومت کا مؤقف تھا کہ یہ اقدام قومی سلامتی کے تحفظ کے لیے ناگزیر تھا۔

اب جب کہ پاکستان کو سائبر بیانیے کے محاذ پر سرگرم کردار ادا کرنا ہے، “ایکس” کی بحالی ایک اہم اسٹریٹجک قدم سمجھا جا رہا ہے۔

کراچی:
پاکستان کی جانب سے فضائی حدود کی بندش کے باعث 13 دنوں میں بھارتی ایئرلائنز کو شدید مالی نقصان اٹھانا پڑا ہے۔

ایوی ایشن ذرائع کے مطابق، 1350 بھارتی پروازیں متاثر ہوچکی ہیں اور اب تک بھارتی ایئرلائنز کو 275 کروڑ بھارتی روپے سے زائد کا نقصان ہو چکا ہے۔

متاثرہ ایئرلائنز میں ایئر انڈیا، انڈیگو، اسپائس جیٹ، آکاسا ایئر، اور ایئر انڈیا ایکسپریس شامل ہیں، جنہیں پاکستان کی فضائی حدود بند ہونے کے باعث متبادل اور طویل روٹس اختیار کرنا پڑ رہے ہیں۔

طویل راستوں سے گزرنے کی وجہ سے فیول، لینڈنگ، ری فیولنگ اور عملے کی تبدیلی جیسے آپریشنل اخراجات میں دگنا اضافہ ہو گیا ہے، جس کے باعث یومیہ کروڑوں روپے کا نقصان ہو رہا ہے۔

انڈیگو ایئر کی تاشقند اور الماتی کی پروازیں بند ہیں، جبکہ امریکا، برطانیہ اور یورپ جانے والی پروازوں کا دورانیہ 4 سے 10 گھنٹے بڑھ چکا ہے۔

اس کے علاوہ، پروازوں کی منسوخی کے باعث ہزاروں بھارتی مسافروں کو ریفنڈز بھی نہیں مل سکے، جس پر مسافروں کی جانب سے شدید ردعمل سامنے آ رہا ہے۔

یہ صورتحال بھارت کی سول ایوی ایشن انڈسٹری کے لیے ایک بڑا چیلنج بن چکی ہے، جو اب مالی اور آپریشنل دباؤ میں ہے۔