بالی ووڈ کے معروف فلم ساز روی چوپڑا کی اہلیہ رینو چوپڑا نے بتایا ہے کہ شاہ رُخ خان نے ان کی ایک فلم کی مدد کی اور اس کی پروڈکشن کے لیے دی گئی رقم پر سود لینے سے صاف انکار کر دیا تھا۔

حال ہی میں ایک انٹرویو کے دوران رینو چوپڑا نے ایس آر کے کی تعریف کرتے ہوئے ایک واقعہ شیئر کیا کہ کس طرح 2017 میں ریلیز ہونے والی فلم میں شاہ رُخ خان نے ان کی مالی مدد کی تھی۔

رینو نے کہا کہ انہوں نے اپنے بیٹے ابھے چوپڑا کی فلم ’اتفاق‘ کی مالی معاونت بغیر سکرپٹ پڑھے کی تھی، جس میں اکشے کھنہ، سدھارتھ ملہوترا اور سوناکشی سنہا نے مرکزی کردار ادا کیے تھے۔

رینو چوپڑا نے یہ بھی بتایا کہ شاہ رُخ خان نے اس فلم کو ان کے کہنے پر نہ صرف سپورٹ کیا بلکہ پروڈکشن کے لیے دی گئی رقم پر سود لینے سے بھی انکار کر دیا اور کہا کہ یہ ان کے لیے حرام ہے۔

انہوں نے مزید کہا کہ شاہ رُخ خان کا کہنا تھا، ’نہیں، یہ میرے لیے حرام ہے، میں سود نہیں لے سکوں گا‘۔ رینو چوپڑا نے بتایا کہ شاہ رُخ خان کے علاوہ دیگر تمام سرمایہ کاروں نے سود لیا، لیکن وہ کسی صورت اس پر راضی نہیں ہوئے۔

رینو نے کہا کہ شاہ رُخ خان بے حد خوش مزاج اور احترام کرنے والے انسان ہیں۔ جب ان کے بیٹے کی فلم بنانے کی بات آئی تو شاہ رُخ نے اس کی بھرپور حمایت کی اور کہا کہ وہ فلم کے لیے مدد کریں گے۔

پنجابی گلوکار اور اداکار گرو رندھاوا اپنی آنے والی فلم ’شانکی سردار‘ کے دوران اسٹنٹ کرتے ہوئے زخمی ہوگئے۔

گرو رندھاوا نے انسٹاگرام پر ایک تصویر شیئر کی ہے جس میں وہ اسپتال کے بستر پر لیٹے ہوئے ہیں۔ اس تصویر میں ان کے چہرے پر خراشیں بھی واضح ہیں۔

انہوں نے تصویر کے ساتھ کیپشن میں لکھا، ’’میرا پہلا اسٹنٹ، میری پہلی چوٹ، لیکن میری روح مضبوط ہے۔ یہ فلم ’شانکی سردار‘ کے سیٹ سے ایک یادگار لمحہ ہے۔ ایکشن کا کام بہت مشکل ہے، لیکن میں اپنے ناظرین کے لیے سخت محنت کروں گا۔‘‘

گرو رندھاوا کی اس پوسٹ پر انٹرٹینمنٹ انڈسٹری کے دوستوں نے ان کی صحت کے لیے تشویش اور نیک خواہشات کا اظہار کیا۔

انوپم کھیر نے گرو کو حوصلہ دیتے ہوئے کہا، ’’آپ سب سے بہترین ہیں، جلد صحتیاب ہوں۔‘‘ جبکہ گلوکار میکا سنگھ نے بھی گرو کی جلد صحت یابی کی دعا کی۔

یاد رہے کہ گرو رندھاوا بھارتی پنجاب سے تعلق رکھتے ہیں اور ایک مشہور گلوکار، شاعر اور میوزک کمپوزر ہیں۔ ان کے مشہور گانوں میں ’لاہور‘، ’اشارے تیرے‘، ’سلولی سلولی‘ اور ’تیرے تے‘ شامل ہیں۔

گرو رندھاوا اپنی نئی فلم ’شانکی سردار‘ میں نمرت اہلووالیا کے ساتھ کام کر رہے ہیں، جو اگلے سال ریلیز ہوگی۔