بالی ووڈ کے سپر اسٹار سلمان خان ایک بار پھر اپنی ایکشن رومانوی فلم ’سکندر‘ کے ساتھ بڑے پردے پر واپسی کے لیے تیار ہیں۔ کیا آپ جانتے ہیں کہ اس فلم کے لیے انہوں نے کتنا معاوضہ لیا ہے؟

نئی فلم ’سکندر‘ میں سلو میاں جنوبی بھارتی اداکارہ رشمیکا مندانا کے ساتھ پہلی بار اسکرین پر نظر آئیں گے، جو عید الفطر کے موقع پر سنیما گھروں کی زینت بنے گی۔

مختلف میڈیا رپورٹس کے مطابق، اے آر مروگاداس کی ہدایتکاری میں بننے والی اس فلم کا مجموعی بجٹ 400 کروڑ بھارتی روپے ہے، جبکہ سلمان خان نے اس فلم کے لیے 120 کروڑ کا بھاری معاوضہ وصول کیا ہے۔

دوسری جانب، رشمیکا مندانا کو اس فلم کے لیے 5 کروڑ روپے بطور معاوضہ دیا گیا ہے۔ فلم میں کاجل اگروال بھی اداکاری کے جوہر دکھائیں گی، جنہیں 3 کروڑ معاوضہ دیا گیا ہے۔

فلم ’سکندر‘ کے ٹیزر اور پہلے گانے ’زہرہ جبین‘ کی ریلیز کے بعد مداحوں کی جانب سے سلمان اور رشمیکا کی جوڑی کو بے حد پسند کیا جا رہا ہے۔

بالی ووڈ کی ماضی کی مشہور اداکارہ عائشہ ٹاکیہ کے شوہر فرحان اعظمی کے خلاف پولیس میں مقدمہ درج کر لیا گیا ہے۔

بھارتی میڈیا کی رپورٹ کے مطابق، یہ مقدمہ ہنگامہ آرائی اور دھمکیوں کے الزامات پر درج کیا گیا ہے۔ رپورٹ میں بتایا گیا ہے کہ عائشہ کے شوہر اپنی ایس یو وی میں بیٹے کے ساتھ جا رہے تھے، لیکن تیز رفتاری کی وجہ سے انہیں مقامی لوگوں نے روک لیا۔

اس پر فرحان اعظمی نے گوا پولیس سے مدد طلب کی، اور پولیس کے پہنچنے پر صورتحال کو کنٹرول کر لیا گیا۔ تاہم، عائشہ ٹاکیہ کے شوہر کے خلاف ہنگامہ آرائی اور دھمکانے کا مقدمہ درج کر لیا گیا۔

شوہر کے خلاف مقدمے پر عائشہ ٹاکیہ نے سوشل میڈیا پر ردعمل دیتے ہوئے کہا کہ ان کے شوہر کو مہاراشٹر سے تعلق رکھنے کی وجہ سے تعصب کا نشانہ بنایا گیا ہے۔ اداکارہ نے کہا کہ “میرے بیٹے اور شوہر کو گالیاں دی گئیں، میرے شوہر نے ہی پولیس کو مدد کے لیے بلایا تھا، لیکن ان کے خلاف ہی مقدمہ درج کر لیا گیا۔”

یاد رہے کہ چند دن پہلے عائشہ ٹاکیہ کے سسر اور سماج وادی پارٹی کے رہنما و مہاراشٹر اسمبلی کے رکن ابو اعظمی کو بھی مسلم مغل حکمران اورنگ زیب کی تعریف کرنے پر مقدمے کا سامنا کرنا پڑا تھا، جس کے بعد اداکارہ کے شوہر کے خلاف مقدمے کو بھی اسی تناظر میں دیکھا جا رہا ہے۔