انڈین پریمیئر لیگ (آئی پی ایل) کا مالیاتی بحران گہرا ہوتا جا رہا ہے۔ ڈی اینڈ پی ایڈوائزری کی تازہ رپورٹ کے مطابق بھارتی کرکٹ بورڈ (بی سی سی آئی) کی ریکارڈ آمدنی کے باوجود آئی پی ایل مالیاتی بحران کے اثرات واضح نظر آنے لگے ہیں۔

رپورٹ کے مطابق آئی پی ایل کی مجموعی قدر میں 17 فیصد کمی ریکارڈ کی گئی ہے، جو 92,500 کروڑ سے کم ہوکر 76,100 کروڑ روپے رہ گئی۔ یہ مسلسل دوسرا سال ہے جب آئی پی ایل کی قدر میں نمایاں کمی سامنے آئی ہے۔

سال 2023 میں آئی پی ایل کی مالیت اپنی تاریخ کی بلند ترین سطح پر پہنچ گئی تھی، تاہم اب اقتصادی دباؤ، اسپانسرشپ کی کمی اور اشتہاری معاہدوں میں سست روی کے باعث لیگ کی مالی حالت متاثر ہو رہی ہے۔

ڈی اینڈ پی ایڈوائزری کے مطابق بھارت میں کرکٹ اب بھی سب سے زیادہ نفع بخش کھیل ہے، مگر مارکیٹ میں بڑھتی مہنگائی، اشتہاری بجٹ میں کٹوتی اور ناظرین کی ترجیحات میں تبدیلی نے آئی پی ایل کی آمدنی پر منفی اثر ڈالا ہے۔

ماہرین کے مطابق اگر یہ رجحان برقرار رہا تو آئندہ دو سیزن میں بی سی سی آئی کو اپنے مالیاتی ڈھانچے اور آمدنی کے ماڈل میں نمایاں تبدیلیاں لانا ہوں گی۔

اقتصادی ماہرین کا کہنا ہے کہ آئی پی ایل مالیاتی بحران سے دیگر ملکی لیگز جیسے کہ ویمنز پریمیئر لیگ (ڈبلیو پی ایل) اور دیگر فرنچائز سسٹمز پر بھی اثر پڑ سکتا ہے، کیونکہ سرمایہ کار اب زیادہ محتاط رویہ اختیار کر رہے ہیں۔

وزیر اطلاعات پنجاب عظمیٰ بخاری نے اعلان کیا ہے کہ ٹی ایل پی پر پابندی پنجاب حکومت کی جانب سے باقاعدہ طور پر منظور کر لی گئی ہے۔ صوبائی کابینہ نے اس فیصلے کی منظوری دی اور وفاقی حکومت کو اس سلسلے میں سمری ارسال کر دی ہے۔

لاہور میں پریس کانفرنس کرتے ہوئے عظمیٰ بخاری نے کہا کہ پنجاب حکومت نے کسی مسجد یا مدرسے کے حوالے سے کوئی فیصلہ نہیں کیا۔ ان کا کہنا تھا کہ ایک مذہبی جماعت کے احتجاج کا کوئی جواز نہیں بنتا کیونکہ پُرتشدد احتجاج کرنے والے ملک اور عوام کے ہمدرد نہیں ہوسکتے۔

عظمیٰ بخاری نے وضاحت کی کہ غزہ کے نام پر احتجاج کی کال دی گئی جبکہ غزہ میں امن معاہدہ پہلے ہی ہو چکا تھا۔ انہوں نے کہا کہ احتجاج کے نام پر سڑکیں بند کرنا یا املاک کو نقصان پہنچانا کسی طور پر برداشت نہیں کیا جائے گا۔

ان کا کہنا تھا کہ کیا پولیس کی گاڑیاں جلانے سے غزہ کا مسئلہ حل ہوگیا؟ ریاست نے فیصلہ کیا ہے کہ پاکستان ایسے احتجاج کا متحمل نہیں ہوسکتا۔ وزیر اطلاعات نے واضح کیا کہ حکومت کی ترجیح عوام کا تحفظ اور امن و امان کی بحالی ہے۔

صوبائی وزیر نے تاجر برادری اور عوام کا شکریہ ادا کیا جنہوں نے ہڑتال کی کال کو مسترد کر دیا۔ انہوں نے کہا کہ پاکستان کے عوام باشعور ہیں اور کسی کے بہکاوے میں نہیں آئیں گے۔

عظمیٰ بخاری نے مزید کہا کہ کیا یہ پُرامن احتجاج تھا؟ مذہبی جماعت کے احتجاج میں 1648 پولیس اہلکار زخمی ہوئے۔ ایسے اقدامات سے ریاستی رٹ کو چیلنج کرنے کی کوشش کی گئی، جسے کسی صورت برداشت نہیں کیا جائے گا۔