پاکستان شوبز انڈسٹری کی معروف ماڈل اور اداکارہ زینب قیوم نے حال ہی میں ایک ویب شو میں اپنی ذاتی زندگی کے بارے میں چونکا دینے والے انکشافات کیے۔ اداکارہ نے بتایا کہ ان کی شادی کے صرف دس ماہ بعد ہی شوہر نے انہیں طلاق دے دی تھی۔

زینب قیوم نے گفتگو کے دوران بتایا کہ انہوں نے 2010 میں شادی کی تھی جس کے بعد وہ دبئی اور پھر لندن منتقل ہوگئیں۔ انہوں نے کہا، ’’میں تو سوچتی تھی کہ شوہر کے گھر سے ہی میری میت اٹھے گی، مگر قسمت کو کچھ اور ہی منظور تھا۔‘‘

اداکارہ کے مطابق ان کے شوہر کو لگتا تھا کہ دونوں کے درمیان مطابقت نہیں ہے، اسی وجہ سے انہوں نے رشتہ ختم کر دیا۔ زینب قیوم نے کہا، ’’میں شکر گزار ہوں کہ انہوں نے سب کچھ خود ہی ختم کر دیا، کیونکہ میں نے اپنی طرف سے پوری کوشش کی تھی۔‘‘

انہوں نے اعتراف کیا کہ طلاق کے بعد وہ ذہنی طور پر بہت متاثر ہوئیں اور اکثر سوچتی تھیں کہ ایک کامیاب کیریئر کے باوجود وہ اپنی ازدواجی زندگی میں کیوں ناکام رہیں۔ تاہم، اب وہ زندگی کو مثبت انداز میں دیکھتی ہیں اور کسی قسم کا کوئی پچھتاوا محسوس نہیں کرتیں۔

زینب قیوم کا شمار پاکستان کی صفِ اول کی ماڈلز میں ہوتا ہے۔ وہ کئی معروف ڈراموں میں بڑی عمر کی مضبوط خواتین کے کردار ادا کرچکی ہیں۔ انہیں 2004 میں لکس اسٹائل ایوارڈز میں سال کی بہترین ماڈل کا اعزاز بھی مل چکا ہے۔

اداکارہ کے ان انکشافات نے سوشل میڈیا پر بھی توجہ حاصل کر لی ہے، جہاں مداح ان کے حوصلے اور صاف گوئی کو سراہ رہے ہیں۔

ایک نئی تحقیق کے مطابق اے آئی ایپس کے صارفین کی تعداد دنیا بھر میں ایک ارب سے تجاوز کر چکی ہے۔ رپورٹ میں بتایا گیا ہے کہ چیٹ جی پی ٹی، گوگل جیمینائی، اینتھروپک کلاوڈ اور دیگر مصنوعی ذہانت پر مبنی ایپس نے ڈیجیٹل دنیا میں انقلابی تبدیلی پیدا کر دی ہے۔

ڈیجیٹل 2026 رپورٹ کے مطابق اے آئی ٹیکنالوجی ابتدائی اپنانے والوں سے نکل کر اب ماس مارکیٹ تک پھیل رہی ہے۔ رپورٹ میں 700 صفحات پر مشتمل تفصیلی ڈیٹا پیش کیا گیا ہے جس میں واضح کیا گیا کہ مصنوعی ذہانت اب انٹرنیٹ صارفین کے روزمرہ کے استعمال کا اہم حصہ بن چکی ہے۔

رپورٹ میں بتایا گیا کہ اس رجحان کے نتیجے میں روایتی سرچ انجنز، مثلاً گوگل اور بنگ کے استعمال میں کمی ریکارڈ کی گئی ہے۔ صارفین اب اپنے سوالات کے جوابات، مواد کی تیاری اور تجزیے کے لیے اے آئی پلیٹ فارمز پر زیادہ انحصار کر رہے ہیں۔

ڈیٹا اینالسٹ سائمن کیمپ کا کہنا تھا کہ اے آئی صارفین کو نہ صرف تیز اور درست معلومات فراہم کر رہا ہے بلکہ انہیں مختلف موضوعات پر زیادہ تفصیلی اور ذاتی نوعیت کے جوابات بھی دیتا ہے۔

انہوں نے مزید کہا کہ یہ تبدیلی مستقبل میں انٹرنیٹ کے ڈھانچے اور ڈیجیٹل مارکیٹ کے رویوں پر گہرے اثرات ڈالے گی۔ اے آئی ایپس کے تیزی سے بڑھتے صارفین سے واضح ہے کہ مصنوعی ذہانت آنے والے چند سالوں میں ڈیجیٹل اکانومی کا بنیادی حصہ بن جائے گی۔