امریکی محکمہ خارجہ کی ترجمان ٹیمی بروس نے کہا ہے کہ صدر ڈونلڈ ٹرمپ بھارت اور پاکستان کے درمیان مسئلہ کشمیر پر ثالثی کی پیشکش کر سکتے ہیں، مگر کسی فریق کو اسے قبول کرنے پر مجبور نہیں کیا جا سکتا۔ ایک میڈیا بریفنگ کے دوران گفتگو کرتے ہوئے ترجمان ٹیمی بروس کا کہنا تھا کہ صدر ٹرمپ کا ماننا ہے کہ ہر ملک کو اپنے مستقبل کا فیصلہ خود کرنے کا حق حاصل ہے۔ انہوں نے واضح کیا کہ امریکی صدر کی ثالثی کی پیشکش مخلصانہ ہے لیکن یہ فیصلہ پاکستان یا بھارت کا اپنا ہوگا کہ وہ اس پیشکش کو قبول کرتے ہیں یا نہیں۔

ترجمان نے مزید کہا کہ وہ کسی دوسرے ملک کے فیصلوں پر تبصرہ نہیں کریں گی کیونکہ یہ ان کا اندرونی معاملہ ہے۔ ان کا کہنا تھا کہ ہم ایسے دور میں جی رہے ہیں جہاں ایک ایسا رہنما موجود ہے جو دنیا میں مثبت تبدیلی لانے کا ارادہ رکھتا ہے، اور امن کو اپنی ترجیح بنائے ہوئے ہے۔

یہ بیان ایسے وقت سامنے آیا ہے جب بھارت کے سیکریٹری خارجہ وکرم مسری نے دعویٰ کیا کہ بھارتی وزیر اعظم نریندر مودی نے امریکی صدر ٹرمپ کو واضح طور پر بتا دیا ہے کہ بھارت پاکستان کے ساتھ کسی تیسرے فریق کی ثالثی قبول نہیں کرے گا۔ اطلاعات کے مطابق، جی 7 اجلاس کے موقع پر مودی اور ٹرمپ کے درمیان 35 منٹ طویل ٹیلیفونک گفتگو ہوئی جس میں مودی نے مسئلہ کشمیر پر بھارتی مؤقف واضح کیا۔

فیلڈ مارشل سید عاصم منیر اس وقت امریکہ کے سرکاری دورے پر موجود ہیں، جہاں ان کی آج وائٹ ہاؤس میں امریکی صدر ڈونلڈ ٹرمپ سے اہم ملاقات طے پا گئی ہے۔ اس موقع پر صدر ٹرمپ فیلڈ مارشل عاصم منیر کے اعزاز میں کیبنٹ روم میں دوپہر ایک بجے خصوصی ظہرانہ دیں گے۔ یہ ملاقات بند دروازوں کے پیچھے (کلوزڈ پریس) ہوگی، تاہم ظہرانے کے بعد دونوں رہنماؤں کی میڈیا سے گفتگو کا امکان ظاہر کیا جا رہا ہے۔ ملاقات میں پاک امریکہ دوطرفہ تعلقات، خطے کی سیکیورٹی صورتحال اور خصوصاً ایران-اسرائیل کشیدگی پر تفصیلی تبادلہ خیال متوقع ہے۔

امریکی نائب صدر جے ڈی وینس اور وزیر دفاع ہینکر سمیت دیگر اعلیٰ حکام کی اس ظہرانے میں شرکت متوقع ہے۔ فیلڈ مارشل عاصم منیر کی امریکی وزیر خارجہ اور وزیر دفاع کے ساتھ علیحدہ ملاقاتیں بھی طے شدہ ہیں جنہیں نہایت اہم قرار دیا جا رہا ہے، خصوصاً ایسے وقت میں جب خطہ غیرمعمولی تناؤ سے دوچار ہے۔

پاک فوج کے شعبہ تعلقات عامہ (آئی ایس پی آر) کے مطابق، اپنے دورے کے دوران فیلڈ مارشل عاصم منیر نے واشنگٹن ڈی سی میں اوورسیز پاکستانیوں سے ملاقات بھی کی، جہاں ان کا پرتپاک استقبال کیا گیا۔ سمندر پار پاکستانیوں نے پاک فوج کے آپریشنز میں شاندار کارکردگی کو سراہا اور قومی سلامتی میں فوج کے کردار کو سراہا۔ آرمی چیف نے اوورسیز پاکستانیوں کی معیشت، ترسیلات زر، سرمایہ کاری اور پاکستان کے سفیر کے طور پر ادا کیے گئے کردار کو سراہتے ہوئے انہیں خراج تحسین پیش کیا۔ بات چیت کا اختتام ایک خوشحال اور محفوظ پاکستان کے لیے مل کر کام کرنے کے عزم پر ہوا۔