ناسا کا Relay 2 سیٹلائٹ، جو 1967 سے مکمل طور پر غیر فعال تھا، حال ہی میں اچانک ایک انتہائی مختصر مگر طاقتور ریڈیو سگنل بھیجنے لگا جس نے سائنسدانوں کو حیرت میں ڈال دیا ہے۔ یہ سیٹلائٹ 1964 میں ایک تجرباتی کمیونیکیشن مشن کے طور پر خلا میں بھیجا گیا تھا، لیکن صرف تین سال بعد ہی اس کے دونوں آن-بورڈ ٹرانسپونڈرز ناکارہ ہو گئے تھے۔ 13 جون کو آسٹریلیا میں واقع ایک جدید ریڈیو ٹیلی اسکوپ ASKAP نے تقریباً 30 نینو سیکنڈ دورانیے پر مشتمل ایک غیر معمولی طاقت کا ریڈیو برسٹ ریکارڈ کیا۔ ابتدائی تجزیے کے بعد معلوم ہوا کہ یہ سگنل خلا کی کسی دور دراز کہکشاں یا سیارے سے نہیں بلکہ زمین سے محض 2,800 میل کے فاصلے پر موجود Relay 2 سیٹلائٹ سے آیا تھا۔ ماہرین کے مطابق اس پراسرار سگنل کی دو ممکنہ وجوہات ہو سکتی ہیں: یا تو سیٹلائٹ نے برسوں میں کوئی اسٹاٹک چارج جمع کیا تھا جو اچانک خارج ہو گیا، یا پھر کسی مائیکرو میٹیورائڈ یعنی خلائی ریت یا چھوٹے شہابی پتھر کے ٹکرانے سے سیٹلائٹ کی سطح پر پلازما پیدا ہوا جو ریڈیو فلش کی صورت میں خارج ہوا۔ چونکہ موجودہ سیٹلائٹ ٹیکنالوجی اس قدر مختصر اور طاقتور سگنل نہیں بھیج سکتی، اسی لیے سائنسدان اس واقعے کو ایک غیر ارادی قدرتی مظہر یا اتفاقی حادثہ قرار دے رہے ہیں۔

ملک کے معروف قانون دان چوہدری اعتزاز احسن نے ایک انٹرویو میں عدالتی فیصلوں پر ادارہ جاتی دباؤ کا الزام لگاتے ہوئے کہا ہے کہ پاکستان میں عدالتوں سے وہی فیصلے آتے ہیں جو آرمی چیف کی مرضی ہو۔ سماء نیوز کو دیے گئے انٹرویو میں ان کا کہنا تھا کہ وہ کھل کر یہ بات کہہ رہے ہیں کہ عدالتی نظام میں اوپر سے نیچے تک فیصلے انہی ہدایات کی بنیاد پر ہوتے ہیں، جو عسکری قیادت کی طرف سے دی جاتی ہیں۔ اعتزاز احسن نے کہا کہ سابق آرمی چیف جنرل قمر جاوید باجوہ کو نواز شریف نے خود تعینات کیا تھا، مگر کچھ عرصے بعد نواز شریف کو جیل بھیج دیا گیا۔ بعد ازاں وہ سزا یافتہ ہونے کے باوجود لندن چلے گئے، حالانکہ عام طور پر عدالت کی اجازت کے بغیر ایسا ممکن نہیں ہوتا۔ انہوں نے مزید کہا کہ نواز شریف، لندن بیٹھ کر جنرل باجوہ کے خلاف بیانات دیتے رہے لیکن جب باجوہ کی مدت ملازمت میں توسیع کی بات آئی تو نواز شریف نے اپنے ارکانِ اسمبلی کو ہدایت دی کہ قومی اسمبلی میں جا کر اس توسیع کے حق میں ووٹ دیں۔

دوسری جانب اعتزاز احسن نے 7 مئی 2025 کو سپریم کورٹ کی جانب سے عام شہریوں کے فوجی عدالتوں میں ٹرائل کے فیصلے کے خلاف نظرثانی اپیل بھی دائر کر دی ہے۔ یہ اپیل سینئر وکیل سردار لطیف کھوسہ کے توسط سے جمع کروائی گئی، جس میں مؤقف اختیار کیا گیا ہے کہ یہ فیصلہ بنیادی حقوق، آئین کی روح اور انصاف کے تقاضوں کے برخلاف ہے، لہٰذا اس اہم اور حساس نوعیت کے کیس کی سماعت تمام حاضر سروس ججز پر مشتمل فل کورٹ کے ذریعے کی جائے۔ اعتزاز احسن کا کہنا ہے کہ فوجی عدالتوں میں عام شہریوں کے ٹرائل سے شہری آزادیوں اور آئینی ضمانتوں پر ضرب پڑتی ہے جس کا جائزہ لینا ضروری ہے