کیریبین کے جزیرے گواڈیلوپ سے تعلق رکھنے والی ایک فرانسیسی خاتون میں خون کے ایک نایاب اور نئے گروپ کی دریافت ہوئی ہے جسے “گواڈا نیگیٹو” کا نام دیا گیا ہے۔ فرانس کی بلڈ سپلائی ایجنسی کے مطابق یہ انکشاف ایک ایسے مریض کے معمول کے طبی معائنے کے دوران ہوا جو سرجری سے قبل خون کے ٹیسٹ کروا رہا تھا۔ اس منفرد بلڈ گروپ کو دنیا کے 48ویں بلڈ گروپ سسٹم کے طور پر تسلیم کر لیا گیا ہے، جس کا باقاعدہ اعلان جون کے آغاز میں اٹلی کے شہر میلان میں بین الاقوامی سوسائٹی آف بلڈ ٹرانسفیوژن کی جانب سے کیا گیا۔ اس دریافت سے قبل سائنسی برادری 47 مختلف بلڈ گروپ سسٹمز کو تسلیم کر چکی تھی۔ فرانس کی بلڈ سپلائی ایجنسی کے ماہر حیاتیات تھیری پیرارڈ نے بتایا کہ پہلی بار 2011 میں اس فرانسیسی خاتون کے خون میں ایک غیر معمولی اینٹی باڈی دریافت ہوئی تھی، تاہم اس وقت تحقیق کے وسائل محدود ہونے کے باعث اس پر مزید کام نہیں ہو سکا۔ اب، 15 سال بعد، اس دریافت کو طبی دنیا میں ایک بڑی پیش رفت قرار دیا جا رہا ہے۔

چیف آف آرمی اسٹاف فیلڈ مارشل عاصم منیر نے کہا ہے کہ شہداء کا خون ہماری قومی قوت کی بنیاد ہے اور ہم ان کے احسانات کا بدلہ کبھی نہیں چکا سکتے۔ یہ بات انہوں نے راولپنڈی میں شہید میجر سید معیز عباس شاہ کی نماز جنازہ میں شرکت کے بعد کہی۔ آئی ایس پی آر کے مطابق فیلڈ مارشل عاصم منیر نے شہید کو خراج عقیدت پیش کرتے ہوئے کہا کہ میجر معیز نے دشمن کی شدید مزاحمت کے باوجود دلیری سے لڑتے ہوئے اپنی جان کا نذرانہ پیش کیا اور اپنی قربانی سے بہادری، حب الوطنی اور ایثار کی اعلیٰ روایات کو زندہ رکھا۔ انہوں نے کہا کہ پوری قوم غم اور فخر کے ملے جلے جذبات کے ساتھ متحد ہے اور شہید کی قربانی کو سلام پیش کرتی ہے۔ فیلڈ مارشل نے اس عزم کا اعادہ کیا کہ پاک فوج اندرونی و بیرونی دشمنوں کے خلاف ہر دم تیار ہے اور قوم کے دفاع میں کوئی کسر نہیں چھوڑے گی۔ شہید میجر معیز عباس شاہ کی نماز جنازہ چکلالہ گیریژن راولپنڈی میں ادا کی گئی جس میں فیلڈ مارشل کے علاوہ وفاقی وزیر داخلہ، اعلیٰ عسکری و سول افسران اور جوانوں نے شرکت کی۔ بعد ازاں شہید کی میت ان کے آبائی علاقے چکوال روانہ کر دی گئی جہاں انہیں مکمل فوجی اعزاز کے ساتھ سپرد خاک کیا گیا۔