کراچی:
ٹک ٹاک نے سال 2025 کی پہلی سہ ماہی یعنی جنوری سے مارچ کے دوران اپنی کمیونٹی گائیڈ لائنز کی خلاف ورزی پر عمل درآمد سے متعلق رپورٹ جاری کر دی ہے۔ رپورٹ کے مطابق، اس دوران پاکستان میں مجموعی طور پر 2 کروڑ 49 لاکھ 54 ہزار 128 ویڈیوز کو حذف کیا گیا۔ حیران کن طور پر، پاکستان میں ویڈیوز کو پیشگی حذف کرنے کی شرح 99.4 فیصد رہی، جب کہ 95.8 فیصد ویڈیوز کو پوسٹ کیے جانے کے 24 گھنٹوں کے اندر ہی ہٹا دیا گیا۔

عالمی سطح پر ٹک ٹاک نے اسی مدت میں 211 ملین ویڈیوز کو حذف کیا، جو کہ پلیٹ فارم پر اپ لوڈ کیے گئے کل مواد کا تقریباً 0.9 فیصد بنتا ہے۔ ان میں سے 184 ملین سے زائد ویڈیوز خودکار سسٹمز کے ذریعے شناخت کی گئیں، جب کہ تقریباً 75 لاکھ ویڈیوز کو بعد ازاں دوبارہ بحال کر دیا گیا۔

رپورٹ میں بتایا گیا ہے کہ حذف شدہ مواد کا 30.1 فیصد حصہ حساس یا بالغ موضوعات پر مبنی تھا، جب کہ 11.5 فیصد ویڈیوز نے پلیٹ فارم کے تحفظ اور شائستگی کے اصولوں کی خلاف ورزی کی۔ مزید 15.6 فیصد مواد نے پرائیویسی اور سیکیورٹی کی ہدایات کی خلاف ورزی کی، اور 45.5 فیصد ویڈیوز کو جھوٹی معلومات کے طور پر نشان زد کیا گیا۔ اس کے علاوہ 13.8 فیصد ویڈیوز کو مصنوعی ذہانت یا ایڈیٹ شدہ میڈیا کے طور پر شناخت کیا گیا۔

ٹک ٹاک کی یہ رپورٹ نہ صرف پلیٹ فارم کی نگرانی کے مؤثر نظام کو ظاہر کرتی ہے بلکہ پاکستان میں حساس مواد کی نگرانی اور تیزی سے کارروائی کے رجحان کو بھی اجاگر کرتی ہے

تل ابیب یونیورسٹی کے ماہرینِ فلکیات پر مشتمل بین الاقوامی ٹیم نے فلکیاتی تاریخ کے ایک نایاب منظر کا مشاہدہ کیا ہے، جس میں ایک ستارہ سپر میسو بلیک ہول کی تباہ کن کشش سے بچ نکلنے میں کامیاب رہا۔ دو برس قبل سائنسدانوں نے AT 2022dbl نامی ستارے کی چمک کو اس وقت ریکارڈ کیا جب وہ ایک بلیک ہول کی زد میں آیا۔ حیرت انگیز طور پر، دو سال بعد اسی مقام سے ویسی ہی چمک دوبارہ دیکھی گئی، جس سے یہ بات ثابت ہوئی کہ ستارہ مکمل طور پر تباہ ہونے کے بجائے بلیک ہول سے نکلنے میں کامیاب رہا۔ یہ واقعہ اس لحاظ سے منفرد ہے کہ یہ پہلا مصدقہ موقع ہے جب کسی ستارے کو بلیک ہول سے فرار حاصل ہوتا دیکھا گیا ہے۔ اس انقلابی تحقیق کی قیادت ڈاکٹر لیڈیا میکریائینی نے کی، جبکہ وائز آبزرویٹری کے ڈائریکٹر اور آسٹروفزکس فیکلٹی کے پروفیسر آئیر ارکاوی نے اسے سپروائز کیا۔ دیگر محققین میں پروفیسر اہد ناکر، طلبہ سارا فارس، یائل ڈیگانی اور مختلف عالمی سائنس دان شامل تھے، جنہوں نے اس حیران کن مظہر کو سائنسی ریکارڈ کا حصہ بنایا۔