صوبہ پنجاب کے دارالحکومت لاہور سمیت مختلف شہروں میں آج زلزلے کے جھٹکے محسوس کیے گئے جس سے شہریوں میں خوف و ہراس پھیل گیا۔ زلزلے کی شدت ریکٹر اسکیل پر 4.4 ریکارڈ کی گئی جب کہ اس کی گہرائی 14 کلومیٹر اور مرکز ساؤتھ ویسٹ لاہور تھا۔ زلزلے کے جھٹکوں نے لاہور، قصور، اوکاڑہ، شیخوپورہ، گوجرانوالہ، مریدکے، کامونکی اور ننکانہ کے علاقوں کو لرزا کر رکھ دیا، جس پر شہری کلمہ طیبہ کا ورد کرتے ہوئے گھروں اور دفاتر سے باہر نکل آئے۔ پنجاب بھر کی ضلعی انتظامیہ نے فوری طور پر عمارتوں کی جانچ پڑتال کا آغاز کر دیا جبکہ پی ڈی ایم اے اور ڈسٹرکٹ ایمرجنسی سینٹرز الرٹ پر ہیں۔ تاہم، اب تک کسی بھی علاقے سے کسی جانی یا مالی نقصان کی اطلاع موصول نہیں ہوئی۔

دو روز قبل بلوچستان کے ضلع موسیٰ خیل اور گردونواح میں بھی شدید زلزلہ آیا تھا جس کی شدت 5.5 ریکارڈ کی گئی اور اس کے نتیجے میں کئی مکانات کو نقصان پہنچا جبکہ متعدد افراد کے زخمی ہونے کی بھی اطلاعات موصول ہوئی تھیں۔ ماہرین ارضیات کے مطابق زمین کی تہہ تین بڑی پلیٹوں پر مشتمل ہے: یوریشین، انڈین اور اریبین۔ ان پلیٹوں کے سرکنے سے زلزلے جنم لیتے ہیں اور ان کی لہریں دائرے کی صورت میں پھیلتی ہیں۔ پاکستان کا دو تہائی رقبہ فالٹ لائنز پر واقع ہے، یہی وجہ ہے کہ کراچی سے اسلام آباد، کوئٹہ سے پشاور، اور گلگت بلتستان تک ملک کے اکثر علاقے زلزلوں کے خطرے سے دوچار ہیں۔ عالمی سطح پر پاکستان زلزلوں کے حوالے سے پانچواں حساس ترین ملک مانا جاتا ہے، جہاں انڈین پلیٹ اور یوریشین پلیٹ کے مسلسل تصادم کے باعث زلزلوں کا خطرہ ہمیشہ موجود رہتا ہے۔

پاکستان نے یکم جولائی کو اقوام متحدہ کی سلامتی کونسل کی ماہانہ صدارت سنبھال لی، جو کہ 2013 کے بعد پہلا موقع ہے کہ پاکستان کو یہ اعزاز حاصل ہوا ہے۔ یہ پاکستان کا سلامتی کونسل میں بطور غیر مستقل رکن آٹھواں دور ہے، جو جنوری 2025 سے دسمبر 2026 تک جاری رہے گا۔ اگرچہ سلامتی کونسل کی صدارت انتظامی نوعیت کی ہوتی ہے اور ہر ماہ تبدیل ہوتی ہے، تاہم اس منصب کے ذریعے کسی ملک کو کونسل کے ایجنڈے، مباحثوں کی نوعیت اور ترجیحات کے تعین میں اثر انداز ہونے کا موقع ملتا ہے۔

رپورٹ کے مطابق 22 جولائی کو پاکستان کی میزبانی میں تنازعات کے کثیرالطرفہ حل پر ایک بین الاقوامی کانفرنس بھی منعقد کی جائے گی۔ ایسے وقت میں جب سلامتی کونسل غزہ اور یوکرین جیسے اہم عالمی تنازعات پر عملی طور پر مفلوج دکھائی دیتی ہے، پاکستان کی قیادت اور سفارتی موجودگی عالمی سطح پر توجہ کا مرکز بنی ہوئی ہے۔ ماہرین کا کہنا ہے کہ موجودہ دور میں جب عالمی سفارتی نظام پر اعتماد کمزور ہوتا جا رہا ہے، پاکستانکے لیے یہ موقع نہ صرف اپنی مؤثر موجودگی کا مظاہرہ کرنے بلکہ فلسطین، کشمیر اور ترقی پذیر ممالک کے مؤقف کو اجاگر کرنے کا اہم موقع بن سکتا ہے۔