امریکی قانون ساز نے ایک نیا قانون تجویز کیا ہے جس کے تحت چینی اے آئی ایپ ڈیپ سیک کے استعمال پر بھاری جرمانے عائد کیے جا سکتے ہیں۔

غیر ملکی خبررساں ادارے کے مطابق، یہ بل ریپبلیکن سینیٹر جوش ہاؤلے کی جانب سے پیش کیا گیا ہے، جس کا مقصد امریکی شہریوں کو چینی آرٹیفیشل انٹیلی جنس کے استعمال سے روکنا ہے۔

اگر یہ قانون منظور ہو جاتا ہے تو چین میں تیار کردہ ٹیکنالوجی کی درآمدگی کو روکا جا سکے گا، اور خلاف ورزی کرنے والوں کو 20 سال تک کی قید اور 10 لاکھ ڈالر جرمانے کا سامنا کرنا پڑے گا۔ اگر یہ خلاف ورزی کسی کاروبار کی جانب سے کی گئی تو جرمانہ بڑھ کر 10 کروڑ ڈالر تک جا سکتا ہے۔

اگرچہ اس قانون میں ڈیپ سیک کا نام نہیں لیا گیا، لیکن یہ بل چینی چیٹ بوٹ کے متعارف ہونے کے صرف ایک ہفتے بعد پیش کیا گیا ہے، جو اس وقت امریکا میں سب سے مقبول اے آئی ایپ بن چکی ہے اور امریکی ٹیک اسٹاک کو نقصان پہنچا رہی ہے۔

یہ بھی یاد رہے کہ امریکی صدر ڈونلڈ ٹرمپ چینی ایپ کو امریکی ٹیک انڈسٹری کے لیے خطرے کی گھنٹی قرار دے چکے ہیں۔

حکومت نے پیکا ایکٹ کے حوالے سے صحافیوں کے خدشات دور کرنے کے لیے ایک ذیلی کمیٹی بنانے کا فیصلہ کیا ہے۔ تفصیلات کے مطابق قومی اسمبلی کی قائمہ کمیٹی برائے اطلاعات و نشریات کا اجلاس ہوا، جس میں یہ فیصلہ کیا گیا کہ صحافیوں کے خدشات کو دور کرنے کے لیے ذیلی کمیٹی تشکیل دی جائے گی۔ چئیرمین کمیٹی پولین بلوچ نے کہا کہ حکومت صحافیوں کے ساتھ بیٹھ کر ان کے خدشات سنے گی اور ان کا حل تلاش کیا جائے گا۔

متحدہ قومی موومنٹ کے رکن کمیٹی امین الحق نے اجلاس میں کہا کہ فیک نیوز ایک حقیقت ہے اور صحافی بھی اس کے خلاف ہیں، تاہم اس قانون پر صحافیوں کو شامل کر کے بات چیت کی جائے۔ سابق وزیر اطلاعات فواد چوہدری نے بھی پاکستان میڈیا ڈویلپمنٹ اتھارٹی کے قیام کی کوشش کی تھی۔

اس پر وفاقی وزیراطلاعات عطا اللہ تارڑ نے وضاحت کی کہ پیکا ایکٹ صرف ڈیجیٹل میڈیا کو ریگولیٹ کرنے کے لیے ہے۔ انہوں نے کہا کہ مثال کے طور پر جب سوشل میڈیا پر قاضی فائز عیسیٰ کے خلاف سنگین دھمکیاں دی گئیں، لیکن ان پر کوئی کارروائی نہیں ہوئی، اسی لیے یہ ایکٹ متعارف کرایا گیا۔ انہوں نے مزید کہا کہ اس ایکٹ سے اخبارات یا ٹی وی چینلز متاثر نہیں ہوں گے کیونکہ وہ پہلے ہی قواعد و ضوابط کے تحت کام کر رہے ہیں۔ اس ایکٹ کے نتیجے میں روایتی میڈیا کی مانگ میں اضافہ ہوگا اور ڈیجیٹل میڈیا پر کروڑوں کمانے والے افراد کو بھی ملکی قوانین کے تحت کچھ دینا ہوگا۔