پاکستان تحریک انصاف کے بانی چیئرمین عمران خان کے خلاف وزیراعظم شہباز شریف کی 10 ارب روپے ہرجانے کی درخواست کو قابلِ سماعت قرار دے دیا گیا ہے۔ تفصیلات کے مطابق لاہور ہائیکورٹ نے وزیراعظم شہباز شریف کی جانب سے دائر کردہ 10 ارب روپے ہرجانے کے کیس میں اختیارِ سماعت کے خلاف درخواست پر محفوظ فیصلہ سنایا، جسے جسٹس چوہدری محمد اقبال نے پیش کیا۔ اپنے فیصلے میں عدالت نے درخواست کو قابل سماعت قرار دیتے ہوئے درخواست گزار کے وکیل کو 20 فروری کو دلائل کے لیے طلب کر لیا ہے۔

بتایا گیا ہے کہ عدالت نے گزشتہ روز درخواست گزار کے وکیل کے دلائل مکمل ہونے کے بعد فیصلہ محفوظ کیا تھا، جہاں دوران سماعت وکیل نے اعلیٰ عدالتوں کے فیصلے پیش کیے اور مؤقف اختیار کیا کہ ڈسٹرکٹ جج کو 10 ارب روپے کے ہرجانے کے دعوے کی سماعت کا اختیار نہیں ہے کیونکہ وہ صرف 5 کروڑ روپے تک کے دعوے کی سماعت کر سکتا ہے۔

اس موقع پر وکیل نے مزید کہا کہ ’قانون کے مطابق ڈسٹرکٹ کورٹ کے دائرہ اختیار کی تشریح اعلیٰ عدالتوں نے کی ہے اور چیف جسٹس لاہور ہائیکورٹ ہی ڈسٹرکٹ کورٹ کو سماعت کے لیے نوٹیفائی کر سکتے ہیں‘۔ درخواست میں عدالت سے استدعا کی گئی کہ ڈسٹرکٹ جج کو اس ہتک عزت کیس پر سماعت سے روکا جائے اور دعوے کی سماعت کے لیے ڈسٹرکٹ کورٹ تشکیل دی جائے۔ عدالت نے تمام نکات سننے کے بعد فیصلہ محفوظ کر لیا۔

جسٹس سرفراز ڈوگر کو اسلام آباد ہائیکورٹ کے قائم مقام چیف جسٹس کے طور پر تعینات کر دیا گیا ہے۔ تفصیلات کے مطابق، لاہور ہائیکورٹ سے حال ہی میں منتقل ہونے والے جسٹس سرفراز ڈوگر کو اسلام آباد ہائیکورٹ کے قائم مقام چیف جسٹس کے عہدے پر مقرر کیا گیا ہے، جس کا نوٹیفیکیشن وفاقی وزارت قانون نے جاری کیا ہے۔ جاری کردہ نوٹیفیکیشن کے مطابق، جسٹس سرفراز ڈوگر اسلام آباد ہائیکورٹ کے مستقل چیف جسٹس کی تعیناتی تک قائم مقام چیف جسٹس کی ذمہ داریاں سنبھالیں گے۔

اس سے پہلے، اسلام آباد ہائیکورٹ کے ججز کی سنیارٹی میں تبدیلی کے خلاف پانچ ججوں کی درخواست مسترد کر دی گئی تھی۔ اسلام آباد ہائیکورٹ کے ججز کی سنیارٹی میں تبدیلی کے خلاف پانچ ججز کی درخواست کو مسترد کرتے ہوئے تحریری فیصلہ بھی جاری کیا گیا، جس میں چیف جسٹس اسلام آباد ہائیکورٹ عامر فاروق نے جسٹس محسن اختر کیانی، جسٹس طارق جہانگیری، جسٹس بابر ستار، جسٹس سردار اعجاز اور جسٹس ثمن رفعت کی درخواستیں مسترد کیں، اور انہوں نے رجسٹرار کو فیصلے کی کاپی متعلقہ ججز کو بھیجنے کی ہدایت بھی کی۔

چیف جسٹس اسلام آباد ہائیکورٹ عامر فاروق نے اپنے فیصلے میں کہا کہ تین صوبائی ہائیکورٹس سے ججز کے تبادلے کے بعد اسلام آباد ہائیکورٹ میں جو سنیارٹی لسٹ تبدیل کی گئی تھی، وہ برقرار رہے گی۔