پاکستان تحریک انصاف کے پیٹرن انچیف عمران خان نے اڈیالہ جیل میں وکلاء اور اہل خانہ سے گفتگو کرتے ہوئے الزام عائد کیا کہ ان پر بڑھتی ہوئی سختیوں کے پیچھے آرمی چیف جنرل عاصم منیر کا براہ راست کردار ہے۔ ان کا کہنا تھا کہ جیل سپرنٹنڈنٹ انجم اور ایک کرنل یہ سب کچھ انہی کے اشارے پر کر رہے ہیں۔ عمران خان نے دعویٰ کیا کہ ان کی اہلیہ بشریٰ بی بی پر بھی جیل میں سختیوں کا دائرہ بڑھا دیا گیا ہے اور ان کے بنیادی حقوق سلب کیے جا رہے ہیں۔ عمران خان نے واضح طور پر پارٹی کو ہدایت دی کہ اگر جیل میں ان کے ساتھ کچھ ہوا تو اس کا جوابدہ صرف عاصم منیر ہوگا۔ انہوں نے اپنی پارٹی کو میڈیا پر اندرونی اختلافات سے گریز اور احتجاجی تحریک پر مکمل توجہ دینے کی ہدایت کی، جبکہ یہ بھی کہا کہ کسی نے تحریک میں حصہ نہ لیا تو وہ خود اس کا فیصلہ جیل سے کریں گے۔

لاہور اور گردونواح میں رات بھر ہونے والی موسلا دھار بارش سے شہر کے متعدد علاقے زیرآب آگئے جبکہ مختلف افسوسناک حادثات میں ایک ہی خاندان کے 5 افراد سمیت 10 شہری جاں بحق ہو گئے۔ سب سے زیادہ بارش پانی والا تالاب میں 171 ملی میٹر ریکارڈ کی گئی جو رواں مون سون سیزن کی بلند ترین مقدار ہے۔لاہور شدید بارش کے باعث ٹھوکر نیاز بیگ میں گھر کی چھت گرنے سے 5 افراد جاں بحق اور 2 زخمی ہوئے، رائیونڈ کے مشن کالونی میں بھی چھت گرنے سے 3 افراد جاں بحق ہو گئے جبکہ ہربنس پورہ میں کرنٹ لگنے سے 2 بچے دم توڑ گئے۔ اسلام آباد، راولپنڈی اور پنجاب کے دیگر شہروں میں بھی موسلا دھار بارش سے نشیبی علاقے زیرآب آ گئے، محکمہ موسمیات کے مطابق بارشوں کا موجودہ سلسلہ 17 جولائی تک جاری رہے گا۔ خیبرپختونخوا میں لینڈ سلائیڈنگ کا خدشہ ہے اور این ڈی ایم اے کی جانب سے الرٹ بھی جاری کر دیا گیا ہے۔