اسلام آباد:
رواں مالی سال 2024-25 کے پہلے سات ماہ (جولائی تا جنوری) کے دوران ملکی برآمدات، درآمدات اور تجارتی خسارے میں اضافہ دیکھنے میں آیا ہے۔

سالانہ بنیادوں پر برآمدات میں 4.59 فیصد اور ماہانہ بنیادوں پر 0.31 فیصد اضافہ ہوا، جس کے نتیجے میں جنوری میں برآمدات 2 ارب 92 کروڑ ڈالرز تک پہنچ گئیں۔

وفاقی ادارہ شماریات کی جانب سے جاری کردہ اعدادوشمار کے مطابق، رواں مالی سال کے پہلے 7 ماہ میں برآمدات 9.98 فیصد بڑھ کر 19 ارب 55 کروڑ 10 لاکھ ڈالرز تک پہنچ گئی ہیں۔

رپورٹ میں یہ بھی بتایا گیا کہ جنوری میں سالانہ بنیادوں پر درآمدات میں اضافہ ہوا، لیکن دسمبر 2024 کے مقابلے میں جنوری 2025 میں درآمدات میں کمی آئی، جنوری میں درآمدات کا حجم 5 ارب 23 کروڑ 30 لاکھ ڈالرز رہا۔

ادارہ شماریات کے مطابق، رواں مالی سال کے پہلے 7 ماہ میں درآمدات میں 6.95 فیصد اضافہ ہوا اور اس کا حجم 33 ارب ڈالرز سے تجاوز کر گیا۔

پاکستان ادارہ شماریات نے یہ بھی بتایا کہ جنوری 2025 میں سالانہ بنیادوں پر تجارتی خسارہ 17.78 فیصد بڑھا جبکہ ماہانہ بنیادوں پر تجارتی خسارہ 5.47 فیصد کم ہوا، جس کے بعد اس کا حجم 2 ارب 31 کروڑ 30 لاکھ ڈالرز ریکارڈ کیا گیا۔

حکومت نے پی آئی اے کی نجکاری کا عمل دوبارہ شروع کرنے کا فیصلہ کیا ہے، اور اس مقصد کے لیے رواں ماہ اظہار دلچسپی طلب کیا جائے گا۔ قومی ائیرلائن پی آئی اے کی نجکاری کے لیے یہ دوسری کوشش مکمل طور پر تیار ہے، جس میں کئی واپس آنے والے بولی دہندگان اور فریقین شامل ہیں۔ قومی اسمبلی کی قائمہ کمیٹی برائے نجکاری کا اجلاس فاروق ستار کی صدارت میں ہوا، جس میں بتایا گیا کہ حکومت نے نئے طیاروں کی خریداری پر 18 فیصد جی ایس ٹی ختم کر دیا ہے تاکہ سرمایہ کاروں کی دلچسپی بڑھائی جا سکے۔

کمیٹی کو بتایا گیا کہ آئی ایم ایف نے حکومت کی تشویش پر اس ٹیکس کو ہٹانے کی منظوری دی ہے۔ چیئرمین نجکاری کمیشن نے کمیٹی کو بتایا کہ حکومت کی جانب سے تحفظات پیش کیے جانے کے بعد آئی ایم ایف نے ٹیکس ختم کرنے پر رضامندی ظاہر کی۔

پچھلے دور میں بولی دہندگان نے نئے طیاروں کی شمولیت اور بیڑے کی توسیع کے لیے حکومت کی طرف سے عائد کردہ 18 فیصد جی ایس ٹی کو معاف کرنے کی سفارش کی تھی۔ ان کا خیال تھا کہ اس ٹیکس کو ہٹانے سے نئے طیاروں کے حصول میں آسانی ہوگی۔ کمیٹی کو آگاہ کیا گیا کہ پی آئی اے کی واجب الادا قرضوں کی مجموعی مالیت 45 ارب روپے ہے، جس میں سے 26 ارب روپے وفاقی بورڈ آف ریونیو (ایف بی آر) کو مختلف ٹیکسوں کی مد میں اور 10 ارب روپے سول ایوی ایشن اتھارٹی کو واجب الادا ہیں۔