کراچی کے علاقے گلشن اقبال سے پاکستان کی سینئر اداکارہ عائشہ خان کی 10 روزہ پرانی لاش ان کے فلیٹ سے برآمد ہوئی ہے۔ پولیس نے تصدیق کی ہے کہ 77 سالہ عائشہ خان اپنے اپارٹمنٹ میں اکیلی رہائش پذیر تھیں اور ابتدائی تحقیقات کے مطابق ان کی موت طبعی معلوم ہوتی ہے۔

یہ افسوسناک واقعہ اس وقت منظرِ عام پر آیا جب پڑوسیوں کو ان کے فلیٹ سے شدید بدبو محسوس ہوئی اور انہوں نے فوری طور پر اہل خانہ کو اطلاع دی، جس کے بعد پولیس موقع پر پہنچی اور لاش کو جناح پوسٹ گریجویٹ میڈیکل سینٹر منتقل کیا۔ بعد ازاں لاش کو سہراب گوٹھ ایدھی سردخانے منتقل کر دیا گیا۔ پولیس کے مطابق عائشہ خان کا پوسٹ مارٹم ان کے خاندان کی اجازت سے کیا جائے گا، جبکہ نماز جنازہ کی تفصیلات بعد میں جاری کی جائیں گی۔

عائشہ خان پاکستان ٹیلی ویژن کے سنہرے دور کی نامور اداکارہ تھیں۔ ان کے مشہور ڈراموں میں افشاں، عروسہ، آنچ، بندھن، شام سے پہلے اور مہندی شامل ہیں۔ انہوں نے کئی دہائیوں تک اپنی فنکارانہ صلاحیتوں سے ناظرین کے دل جیتے اور ان کی خدمات آج بھی ڈرامہ انڈسٹری میں قدر کی نگاہ سے دیکھی جاتی ہیں۔ ان کی وفات پر مداحوں، فنکاروں اور شوبز انڈسٹری کی جانب سے گہرے دکھ اور افسوس کا اظہار کیا جا رہا ہے

بیروت: لبنان نے ڈزنی کی نئی لائیو ایکشن فلم ’Snow White‘ کو ملکی سینما گھروں میں نمائش سے روک دیا ہے۔ غیر ملکی میڈیا کے مطابق اس پابندی کی بنیادی وجہ فلم میں اسرائیلی اداکارہ گال گیڈٹ کی کاسٹنگ ہے، جو فلم میں ’ایول کوئین‘ کا کردار ادا کر رہی ہیں۔

یہ فیصلہ لبنان کے وزیر داخلہ احمد الحجّار کی جانب سے کیا گیا ہے، جو ملک کے فلم اور میڈیا مانیٹرنگ بورڈ کی سفارشات کے بعد سامنے آیا۔ مقامی میڈیا رپورٹس کے مطابق، اس اقدام کا تعلق حالیہ اسرائیلی فوجی کارروائیوں سے جوڑا جا رہا ہے، جن میں لبنان میں حزب اللہ کے ٹھکانوں کو نشانہ بنایا جا رہا ہے، اور جن میں عام شہری بھی متاثر ہو رہے ہیں۔

لبنان اور اسرائیل کے درمیان حالیہ کشیدگی کے تناظر میں یہ فیصلہ کیا گیا ہے، جہاں دونوں فریقین کے درمیان عسکری محاذ آرائی شدت اختیار کرتی جا رہی ہے۔ لبنان کی حکومت نے اس حساس موقع پر ایسا مواد روکنے کا فیصلہ کیا ہے جسے عوامی اشتعال یا عدم اطمینان کا باعث بننے کا خدشہ ہو۔

یہ امر قابل ذکر ہے کہ لبنان اس سے قبل بھی اسرائیلی پس منظر رکھنے والے فنکاروں، فلموں یا دیگر مواد پر پابندیاں عائد کرتا رہا ہے، اور یہ پالیسی طویل عرصے سے ملکی موقف کا حصہ رہی ہے۔