آریان خان کی نیٹ فلکس سیریز ’دی با***ڈز آف بالی وڈ‘ کا اعلان

کنگ شاہ رُخ خان کے بیٹے آریان خان کی ہدایتکاری میں بننے والی نیٹ فلکس سیریز کا اعلان کر دیا گیا ہے۔

بھارتی میڈیا کی رپورٹ کے مطابق آریان خان کی ہدایتکاری میں بننے والی نیٹ فلکس سیریز ’دی با***ڈز آف بالی وڈ‘ کا اعلان ہوا۔ یہ اعلان ’نیکسٹ آن نیٹ فلکس انڈیا 2025‘ ایونٹ میں شاہ رخ خان نے خود ایک مزاحیہ پرومو کے ذریعے کیا۔

اس پرومو میں شاہ رخ مختلف انداز میں اپنے مشہور ڈائیلاگز دہرانے کی کوشش کرتے ہیں، لیکن ہدایتکار بار بار ری ٹیک کا مطالبہ کرتا ہے۔

آخرکار، شاہ رخ غصے میں کہتے ہیں، ’باپ کا راج ہے کیا؟‘ جس پر کیمرہ آریان کی طرف مڑتا ہے اور وہ مسکراتے ہوئے جواب دیتے ہیں، ’ہاں‘۔ اس مزاحیہ تبادلے کے بعد، شاہ رخ خان اپنے بیٹے آریان کی سیریز کا تعارف کراتے ہوئے اسے ’سب سے نرالی، جرات مند اور فلمی ترین کہانی‘ قرار دیتے ہیں۔ پرومو میں شاہ رُخ خان کی مشہور فلم ’جوان‘ کا بھی حوالہ دیا گیا ہے، جہاں آریان اپنے والد کے مشہور مکالمے ’بیٹے پر ہاتھ اٹھانے سے پہلے…‘ کی طرف اشارہ کرتے ہیں۔

شاہ رخ خان نے کہا کہ آریان اور ان کی ٹیم جلد ہی اس منفرد نام کے پیچھے کہانی بھی پیش کریں گے۔

یاد رہے کہ یہ سیریز ریڈ چلیز انٹرٹینمنٹ کے بینر تلے بنائی گئی ہے جس کی پروڈکشن گوری خان کر رہی ہیں۔ اس ایونٹ میں گوری خان اور سہانا خان بھی آریان کی حوصلہ افزائی کے لیے موجود تھیں۔

سیریز ’دی با***ڈز آف بالی وڈ‘ کو لے کر شوبز حلقوں میں پہلے ہی خاصی چہ مگوئیاں ہو رہی ہیں، کیونکہ یہ آریان خان کا بطور ہدایتکار پہلا بڑا پراجیکٹ ہے۔ ان کی تخلیقی صلاحیتوں اور بالی وڈ کی اندرونی دنیا کے منفرد زاویے کو اس سیریز میں پیش کیے جانے کی توقع کی جا رہی ہے۔ مداحوں کو یہ جاننے کا بھی بے حد تجسس ہے کہ بالی وڈ کے “نرالے اور جرات مند” پہلو کو آریان کس انداز میں سکرین پر لاتے ہیں۔

نیٹ فلکس کی جانب سے اس سیریز کو 2025 کی اہم ریلیز قرار دیا جا رہا ہے، اور ریڈ چلیز انٹرٹینمنٹ کی پروڈکشن ہونے کی وجہ سے اس کے معیار پر پہلے ہی اعتماد ظاہر کیا جا رہا ہے۔ فلمی پن، حقیقت اور طنز و مزاح کے امتزاج سے بھرپور یہ سیریز ممکنہ طور پر ناظرین کو نہ صرف تفریح فراہم کرے گی بلکہ انہیں سوچنے پر بھی مجبور کرے گی۔