پہلگام واقعے اور پاک بھارت کشیدگی کے بعد پاکستان کی جانب سے بھارتی ایئرلائنز کے لیے فضائی حدود کی بندش آج 22ویں روز میں داخل ہو گئی ہے، جس کے باعث بھارتی ہوا بازی کی صنعت کو شدید مالی نقصان اٹھانا پڑا ہے۔ ایوی ایشن ذرائع کے مطابق بھارتی ایئرلائنز کو اب تک 5 ارب روپے سے زائد کا نقصان ہو چکا ہے، جبکہ کارگو سروسز بھی متاثر ہو رہی ہیں۔ فضائی بندش کے باعث بھارتی پروازوں کو امریکا، یورپ اور کینیڈا کے لیے طویل متبادل راستے اختیار کرنا پڑ رہے ہیں، جس سے وقت، ایندھن اور عملے کے اخراجات میں نمایاں اضافہ ہو گیا ہے۔ لاکھوں مسافروں کو تاخیر اور دیگر مشکلات کا سامنا ہے، جبکہ بھارتی برآمدات بھی متاثر ہو رہی ہیں۔ حکام کے مطابق جب تک پاک بھارت تعلقات معمول پر نہیں آتے، فضائی حدود بند رہیں گی، جو بھارتی ایوی ایشن انڈسٹری کے لیے ایک بڑا چیلنج ہے۔

پاک-بھارت کشیدگی کے باوجود افغانستان سے خشک میوہ جات سے لدے 5 تجارتی ٹرک واہگہ کے راستے بھارت روانہ ہو گئے۔ سیکیورٹی ذرائع کے مطابق یہ ٹرک کئی ہفتوں سے نیشنل لاجسٹک سیل کے تحت واہگہ پورٹ پر کھڑے تھے اور بالآخر انہیں بھارت بھیجنے کی اجازت دے دی گئی۔ پاکستانی ڈرائیوروں نے یہ سامان بھارتی حدود میں منتقل کیا جنہیں بھارتی حکومت نے 24 گھنٹے کے انٹری پرمٹ جاری کیے تھے۔ افغان حکومت نے گزشتہ ماہ پاکستان سے درخواست کی تھی کہ 150 ٹرکوں کو بھارت بھیجنے کی اجازت دی جائے، جس پر پاکستان نے یکم مئی کو مشروط اجازت دے دی تھی۔ تاہم سرحدی کشیدگی کے باعث معاملہ مؤخر رہا۔ اب مزید ٹرک بھی آئندہ دنوں میں بھارت بھیجے جائیں گے۔ یاد رہے کہ پاک-بھارت تجارت 2019 سے معطل ہے، مگر افغانستان اور بھارت کے درمیان ٹرانزٹ ٹریڈ واہگہ کے راستے جاری ہے۔