بالی ووڈ اداکار ارباز خان کی سابقہ اہلیہ اور معروف ڈانسر و ماڈل ملائیکہ اروڑہ نے دوسری شادی کی خواہش کا اظہار کر دیا ہے۔ بھارتی میڈیا کے مطابق، ایک حالیہ انٹرویو میں 51 سالہ ملائیکہ نے کہا کہ وہ محبت پر اب بھی یقین رکھتی ہیں اور دوسری شادی کے امکان کو کبھی مسترد نہیں کیا۔ ان کا کہنا تھا کہ جب ملائیکہ اروڑہ نے ارباز خان سے شادی کی تھی تو وہ بہت کم عمر تھیں، اسی لیے وہ نوجوان لڑکیوں کو مشورہ دیتی ہیں کہ شادی جیسے اہم فیصلے میں جلد بازی نہ کریں۔ ملائیکہ کا یہ بیان سوشل میڈیا پر تیزی سے وائرل ہو رہا ہے اور مداحوں کے ساتھ ساتھ ناقدین بھی اس پر بھرپور تبصرے کر رہے ہیں۔ یاد رہے کہ ارباز اور ملائیکہ 18 سالہ رفاقت کے بعد 2017 میں علیحدہ ہوئے تھے، جس کے بعد ملائیکہ کا نام اداکار ارجن کپور کے ساتھ جوڑا گیا تاہم 2024 میں ان کا رشتہ بھی ٹوٹ گیا۔ دوسری جانب ارباز خان نے 2023 میں ایک مشہور میک اپ آرٹسٹ سے دوسری شادی کی تھی۔

سروں کے شہنشاہ اور قوالی کے بے تاج بادشاہ استاد نصرت فتح علی خان کو مداحوں سے بچھڑے 28 برس بیت گئے۔ 13 اکتوبر 1948 کو فیصل آباد میں پیدا ہونے والے استاد نصرت فتح علی خان نے اپنے والد و استاد مبارک علی خان سے موسیقی کی ابتدائی تعلیم حاصل کی اور قوالی کی دنیا میں ایک نئی پہچان بنائی۔

1971 میں قوالی حق علی علی سے انہیں مقبولیت ملی، جس کے بعد انہوں نے ایک ہزار سے زائد قوالیاں اور 125 البمز ریلیز کیے۔ گنیز بک آف ورلڈ ریکارڈ میں نام درج کرواتے ہوئے انہوں نے پاکستان کا نام دنیا بھر میں روشن کیا۔ ان کی قوالیاں جیسے دم مست قلندر علی علی آج بھی مداحوں کے دلوں میں زندہ ہیں۔

1995 میں کینیڈین گٹارسٹ مائیکل بروک اور پیٹر گیبریل کے ساتھ عالمی فیوژن پروجیکٹس نے انہیں دنیا بھر میں مقبول بنا دیا۔ ان کے البم مست مست نے انہیں مغربی دنیا میں بھی شہرت بخشی۔ انہوں نے یونیسکو میوزک ایوارڈ، پرائیڈ آف پرفارمنس سمیت کئی بڑے اعزازات اپنے نام کیے اور مشرق و مغرب کی موسیقی کو یکجا کر کے پاکستان کے ثقافتی سفیر بنے۔

بھارت میں بھی ان کے چرچے ہوئے اور انہوں نے بالی ووڈ کے لیے کئی گیت گائے۔ 16 اگست 1997 کو لندن میں دل کا دورہ پڑنے سے وہ اس دنیا سے رخصت ہو گئے۔ ان کی 28ویں برسی پر مداح عقیدت و احترام کے ساتھ ان کے فن کو یاد کر رہے ہیں۔ ان کی آواز آج بھی سننے والوں کو وجدانی کیفیت میں لے جاتی ہے۔