بالی ووڈ اداکار ارباز خان کی سابقہ اہلیہ اور معروف ڈانسر و ماڈل ملائیکہ اروڑہ نے دوسری شادی کی خواہش کا اظہار کر دیا ہے۔ بھارتی میڈیا کے مطابق، ایک حالیہ انٹرویو میں 51 سالہ ملائیکہ نے کہا کہ وہ محبت پر اب بھی یقین رکھتی ہیں اور دوسری شادی کے امکان کو کبھی مسترد نہیں کیا۔ ان کا کہنا تھا کہ جب ملائیکہ اروڑہ نے ارباز خان سے شادی کی تھی تو وہ بہت کم عمر تھیں، اسی لیے وہ نوجوان لڑکیوں کو مشورہ دیتی ہیں کہ شادی جیسے اہم فیصلے میں جلد بازی نہ کریں۔ ملائیکہ کا یہ بیان سوشل میڈیا پر تیزی سے وائرل ہو رہا ہے اور مداحوں کے ساتھ ساتھ ناقدین بھی اس پر بھرپور تبصرے کر رہے ہیں۔ یاد رہے کہ ارباز اور ملائیکہ 18 سالہ رفاقت کے بعد 2017 میں علیحدہ ہوئے تھے، جس کے بعد ملائیکہ کا نام اداکار ارجن کپور کے ساتھ جوڑا گیا تاہم 2024 میں ان کا رشتہ بھی ٹوٹ گیا۔ دوسری جانب ارباز خان نے 2023 میں ایک مشہور میک اپ آرٹسٹ سے دوسری شادی کی تھی۔

روس کی نامور ماڈل اور 2017 میں مس یونیورس مقابلے میں نمائندگی کرنے والی کسینیا ایلکزینڈروا کار حادثے کے نتیجے میں جاں بحق ہوگئیں۔ روسی میڈیا کے مطابق یہ افسوسناک واقعہ 5 جولائی کو تویر اوبلاست میں اس وقت پیش آیا جب وہ اپنے شوہر کے ساتھ سفر کر رہی تھیں۔ دورانِ سفر اچانک ایک بارہ سنگھا ان کی گاڑی کے سامنے آ گیا جس کے باعث گاڑی کی ونڈ شیلڈ ٹوٹ گئی اور کسینیا کو شدید چوٹیں آئیں۔ حادثے کے بعد وہ کومہ میں چلی گئیں اور تقریباً ایک ماہ تک موت و زندگی کی کشمکش میں رہنے کے بعد انتقال کر گئیں۔ حیران کن طور پر ان کے شوہر اس حادثے میں محفوظ رہے۔ یاد رہے کہ کسینیا 2017 میں نائب مس روس بھی منتخب ہوئی تھیں جبکہ اس حادثے سے محض چار ماہ قبل ان کی شادی ہوئی تھی۔