سپریم کورٹ آف پاکستان میں 26ویں آئینی ترمیم کے خلاف دائر درخواستوں پر باقاعدہ سماعت کا آغاز ہو چکا ہے، جس کی سربراہی جسٹس امین الدین کر رہے ہیں۔ آٹھ رکنی آئینی بینچ میں جسٹس جمال خان مندوخیل، جسٹس محمد علی مظہر، جسٹس عائشہ ملک، جسٹس حسن اظہر رضوی، جسٹس مسرت ہلالی، جسٹس نعیم افغان اور جسٹس شاہد بلال شامل ہیں۔ دورانِ سماعت جسٹس امین نے واضح کیا کہ عدالت آئین کے دائرے میں رہتے ہوئے کام کرے گی اور جب تک آئینی ترمیم واپس نہیں لی جاتی، عدالت کو موجودہ آئین پر ہی انحصار کرنا ہوگا۔

جسٹس مسرت ہلالی نے ریمارکس دیے کہ چونکہ عدالت نے 26ویں آئینی ترمیم کو معطل نہیں کیا، اس لیے اسے فی الحال آئین کا حصہ تصور کیا جائے گا۔ درخواست گزار وکیل حامد خان نے دلائل دیتے ہوئے کہا کہ یہ ترمیم پارلیمنٹ سے غیر معمولی انداز میں، رات کے وقت منظور کرائی گئی، اور سپریم کورٹ کے تمام ججز کو بینچ کا حصہ ہونا چاہیے۔ ان کا کہنا تھا کہ 26ویں ترمیم کے ذریعے جوڈیشل کمیشن کی ساخت متاثر ہوئی ہے، اور ججز کی اکثریت کو اقلیت میں تبدیل کر دیا گیا ہے، جس سے عدلیہ کی آزادی پر براہِ راست اثر پڑا ہے۔

عدالتی بینچ نے وکیل سے آئینی بینچ کے اختیارات پر دلائل طلب کیے اور یہ سوال اٹھایا کہ عدالت کس اختیار کے تحت فل کورٹ تشکیل دے سکتی ہے۔ جسٹس عائشہ ملک نے نشاندہی کی کہ جوڈیشل آرڈر کے ذریعے فل کورٹ کی تشکیل پر کوئی قدغن نہیں ہے، اور اگر عام مقدمات میں فل کورٹ تشکیل دی جا سکتی ہے تو اس حساس آئینی معاملے میں کیوں نہیں؟

پاکستان کے ضلع اورکزئی میں سکیورٹی فورسز نے انٹیلی جنس معلومات کی بنیاد پر 7 اور 8 اکتوبر 2025ء کی درمیانی شب کامیاب آپریشن کیا، جس کے نتیجے میں 19 بھارتی اسپانسرڈ خوارج مارے گئے۔ پاک فوج کے شعبہ تعلقات عامہ (آئی ایس پی آر) کے مطابق، یہ دہشتگرد ہندوستانی پراکسی فتنہ “الخوارج” سے تعلق رکھتے تھے۔ اورکزئی آپریشن کے دوران شدید فائرنگ کا تبادلہ ہوا، جس میں لیفٹیننٹ کرنل جنید عارف (عمر 39 سال) اور میجر طیب راحت (عمر 33 سال)، دونوں کا تعلق ضلع راولپنڈی سے تھا، بہادری سے فرنٹ لائن پر لڑتے ہوئے شہید ہو گئے۔

اس کے علاوہ 9 مزید سپاہی بھی شہادت کے عظیم رتبے پر فائز ہوئے، جن میں نائب صوبیدار اعظم گل (خیبر)، نائیک عادل حسین (کرم)، نائیک گل امیر (ٹانک)، لانس نائیک شیر خان (کرم)، لانس نائیک فراز (مانسہرہ)، لانس نائیک ارشاد حسین (کرم)، سپاہی طفیل خان (مالاکنڈ)، سپاہی عاقب علی (صوابی) اور سپاہی محمد زاہد (کرم) شامل ہیں۔

آئی ایس پی آر کے مطابق، علاقے میں موجود دیگر دہشتگردوں کے خاتمے کے لیے سینیٹائزیشن آپریشن جاری ہے۔ پاکستان کی سکیورٹی فورسز بھارتی اسپانسرڈ دہشتگردی کے مکمل خاتمے کے لیے پرعزم ہیں، اور ہمارے جوانوں کی یہ قربانیاں اس عزم کو مزید تقویت دیتی ہیں۔