اسلام آباد کی ایک مقامی عدالت نے وفاقی تحقیقاتی ادارے (ایف آئی اے) کی درخواست پر ملک کے 27 معروف یوٹیوب چینلز کو بلاک کرنے کا حکم جاری کردیا ہے۔ جوڈیشل مجسٹریٹ عباس شاہ نے اس معاملے پر ایف آئی اے کی جانب سے دی گئی درخواست پر سماعت کی اور شواہد کا جائزہ لینے کے بعد دو صفحات پر مشتمل تحریری حکم نامہ جاری کیا، جس میں کہا گیا ہے کہ ایف آئی اے نے 2 جون کو ریاست مخالف مواد کے حوالے سے انکوائری شروع کی تھی۔ اسلام آباد عدالت کا کہنا ہے کہ پیش کردہ ریکارڈ اور شواہد سے معلوم ہوتا ہے کہ مذکورہ مواد پیکا ایکٹ اور تعزیراتِ پاکستان کے تحت قابل سزا جرم کے زمرے میں آتا ہے، لہٰذا یوٹیوب انتظامیہ کو ان 27 چینلز کو فوری طور پر بلاک کرنے کا حکم دیا گیا ہے۔

اس حوالے سے سینیٹ کی قائمہ کمیٹی برائے انفارمیشن ٹیکنالوجی کا اجلاس بھی ہوا، جس میں چیئرپرسن کمیٹی نے سوشل میڈیا پر ریاست مخالف پراپیگنڈا پر تشویش کا اظہار کیا اور پی ٹی اے سے اقدامات کی وضاحت طلب کی۔ چیئرمین پی ٹی اے نے جواب دیا کہ اتھارٹی کے پاس یوٹیوب چینلز یا اکاؤنٹس کو براہ راست بلاک کرنے کا اختیار محدود ہے، تاہم روزانہ 300 کے قریب مواد ہٹانے کی درخواستیں موصول ہوتی ہیں۔ سرکاری اداروں کے لیے ایک علیحدہ پورٹل بنایا گیا ہے، جہاں 45 ہزار سے زائد شکایات درج کی جاچکی ہیں۔ سینیٹر کامران مرتضیٰ نے تجویز دی کہ سوشل میڈیا کمپنیوں کو پاکستان میں اپنے دفاتر قائم کرنے کا پابند کیا جائے تاکہ ریاست مخالف مواد پر بروقت کارروائی ممکن ہو۔ پی ٹی اے کے مطابق سوشل میڈیا کمپنیاں سیاسی مواد کو ہٹانے سے گریز کرتی ہیں، تاہم انفرادی شکایات پر صارفین کو براہ راست جواب ضرور دیتی ہیں

وزیر دفاع خواجہ آصف نے ایک انٹرویو میں کہا ہے کہ پاکستان کو افغانستان کے ساتھ اپنی سرحدوں پر بھی وہی سخت اور مؤثر انتظامات کرنے کی ضرورت ہے جیسے ایران کے ساتھ کیے گئے ہیں۔ انہوں نے زور دیا کہ غیرقانونی کاروبار میں بڑی تعداد میں افغان شہری ملوث پائے گئے ہیں، جنہوں نے نہ صرف پاکستان کی ٹرانسپورٹ پر قبضہ جما رکھا ہے بلکہ غیرقانونی رہائش گاہیں اور کالونیاں بھی بنا رکھی ہیں۔ خواجہ آصف کے مطابق اس وقت بھی ایک سے ڈیڑھ لاکھ افغان شہری غیرقانونی طور پر پاکستان میں موجود ہیں۔ انہوں نے دہشت گردی کے الزامات ریاستی اداروں پر عائد کرنے کی مذمت کرتے ہوئے کہا کہ یہ رویہ غیر ذمہ دارانہ ہے۔ خواجہ آصف نے تحریک انصاف کے رہنما علی امین گنڈا پور پر تنقید کرتے ہوئے کہا کہ اُن کے لیڈر نے خیبرپختونخوا میں دہشت گردوں کو آباد کیا اور اب وہ خود وفاقی حکومت اور ریاستی اداروں پر تنقید کر رہے ہیں۔ وزیر دفاع نے مزید کہا کہ پی ٹی آئی کے اندر سے بھی علی امین گنڈا پور کے خلاف آوازیں اٹھ رہی ہیں اور ان پر دونمبری کے الزامات لگائے جا رہے ہیں، اس لیے ان جیسے افراد کے بیانات کو سنجیدگی سے لینے کی ضرورت نہیں۔ خواجہ آصف نے واضح کیا کہ افغانستان کے ساتھ پاکستان کے سفارتی تعلقات موجود ہیں، اور اسلام آباد میں افغان سفارت خانہ بھی فعال ہے، لیکن سیکیورٹی اور ریاستی تحفظات کے تحت بارڈر پالیسی پر سخت اقدامات کی ضرورت ہے۔