سپریم کورٹ نے ججز ٹرانسفر کیس کا فیصلہ سنا دیا ہے جس کے مطابق اسلام آباد ہائیکورٹ کے تین ججز کے تبادلے کو آئینی اور درست قرار دیا گیا۔ 5 رکنی آئینی بینچ کے تین ججز نے ٹرانسفر کو جائز قرار دیا جبکہ دو ججز نے اختلافی نوٹ تحریر کیا۔ فیصلہ جسٹس محمد علی مظہر نے پڑھ کر سنایا، جب کہ جسٹس شاہد بلال حسن اور جسٹس صلاح الدین پنہور نے اکثریتی فیصلے سے اتفاق کیا۔

اختلافی نوٹ جسٹس نعیم اختر افغان اور جسٹس شکیل احمد کی جانب سے پیش کیا گیا، جس میں ٹرانسفر کو غیر آئینی اور بدنیتی پر مبنی قرار دیا گیا۔ انہوں نے واضح طور پر کہا کہ ججز کا تبادلہ آئین پاکستان کے تحت درست نہیں اور اس میں صدر مملکت کی جانب سے آئینی حدود کی خلاف ورزی کی گئی ہے۔

اختلافی نوٹ میں مزید کہا گیا ہے کہ تبادلہ کے عمل میں نہ مدت مقرر کی گئی اور نہ ہی اس کی وجوہات بیان کی گئیں۔ دونوں ججز کے مطابق یہ تبادلہ غیر شفاف اور عجلت میں کیا گیا۔

انتہائی اہم پہلو یہ ہے کہ اختلافی نوٹ میں انکشاف کیا گیا کہ ججز کے تبادلے کے پیچھے خفیہ اداروں، خاص طور پر آئی ایس آئی، کی مداخلت کا کردار ہے۔ اختلافی رائے میں کہا گیا ہے کہ آئی ایس آئی جیسے ادارے کو ججز کی تقرری یا تبادلے میں کوئی کردار حاصل نہیں اور یہ آئینی طور پر عدلیہ کے دائرہ کار میں مداخلت کے مترادف ہے۔

سپریم کورٹ نے اپنے مختصر فیصلے میں یہ معاملہ بھی صدر مملکت کو واپس بھیج دیا کہ وہ فیصلہ کریں کہ ججز کا تبادلہ عارضی ہے یا مستقل، اور سنیارٹی کا تعین کس بنیاد پر ہوگا۔ اس وقت تک جسٹس سرفراز ڈوگر قائم مقام چیف جسٹس اسلام آباد ہائیکورٹ کے طور پر اپنے فرائض انجام دیتے رہیں گے۔

یہ فیصلہ اور اختلافی نوٹ عدلیہ، آئینی عملداری، اور خفیہ اداروں کی حدود سے متعلق کئی سوالات کو جنم دیتا ہے، جن پر مستقبل میں بحث متوقع ہے۔

ڈی جی آئی ایس پی آر نے کہا ہے کہ پاکستان کی مسلح افواج آئین کے تحت اور ریاستی احکامات کی روشنی میں اپنے فرائض بخوبی سرانجام دے رہی ہیں۔ یہ بات ڈی جی آئی ایس پی آرنے کراچی میں سیلانی آئی ٹی پروگرام کے طلباء کے ساتھ ایک خصوصی نشست کے دوران کہی، جہاں ان کا پرجوش استقبال کیا گیا اور ان پر پھولوں کی پتیاں نچھاور کی گئیں۔ نشست کے دوران طلباء نے ملکی داخلی و خارجی سکیورٹی سمیت مختلف موضوعات پر سوالات کیے جن کے جواب میں ڈی جی آئی ایس پی آر نے کہا کہ آپریشن بنیان المرصوص میں کامیابی امن کی جیت ہے اور پاکستان نے ہمیشہ جنگ کے بجائے امن کو ترجیح دی ہے۔

لیفٹیننٹ جنرل احمد شریف نے مزید کہا کہ پاکستان خطے میں نیٹ ریجنل اسٹیبلائزر کے طور پر اپنا کردار ادا کرتا رہے گا، اور پاک افواج اپنی پیشہ ورانہ مہارت، نظم و ضبط اور آئینی حدود میں رہتے ہوئے ریاستی ذمہ داریاں ادا کر رہی ہیں۔ نشست کے اختتام پر طلباء نے ڈی جی کا شکریہ ادا کیا اور اس طرح کے انٹریکٹیو سیشنز کے تسلسل کی خواہش کا اظہار کیا۔ ان کا کہنا تھا کہ پاک افواج قوم کی پہچان ہیں اور عوام ہی ان کی اصل طاقت ہیں۔