ایران کے وزیر خارجہ عباس عراقچی نے واضح کیا ہے کہ ان کا ملک جوہری ٹیکنالوجی سے کسی صورت دستبردار نہیں ہوگا، کیونکہ اس کے حصول کے لیے ایرانی سائنسدانوں نے بے پناہ محنت اور قربانیاں دی ہیں۔ عرب میڈیا سے گفتگو میں وزیر خارجہ عباس عراقچی نے کہا کہ بارہ روزہ اسرائیلی جارحیت کے بعد ایران کا عزم اور بھی پختہ ہو چکا ہے، اور اب یہ بات یقینی ہے کہ کوئی بھی ایرانی شہری جوہری ٹیکنالوجی کو چھوڑنے کے حق میں نہیں ہوگا۔ انہوں نے کہا کہ ایران پر جو جنگ مسلط کی گئی، وہ درحقیقت جوہری ہتھیاروں کے جھوٹے دعووں پر مبنی تھی، حالانکہ ہمارا جوہری پروگرام پُرامن مقاصد کے لیے ہے۔ عباس عراقچی نے مزید کہا کہ ایران کے عوام نے اس پروگرام کے لیے سختیاں جھیلی ہیں اور اب ان کی قربانیوں کو ضائع نہیں ہونے دیا جائے گا۔ ان کا یہ بھی کہنا تھا کہ امریکہ نے ایران کی پُرامن جوہری تنصیبات پر حملہ کرکے بین الاقوامی قوانین کی خلاف ورزی کی، جس کے بعد ایران کا سفارت کاری سے اعتبار اٹھ گیا۔ اقوام متحدہ کی ناکامی اور دشمنوں کی غیرمربوط درخواستیں ایران کے مؤقف پر اثرانداز نہیں ہو سکتیں۔ انہوں نے ماسکو پہنچنے پر میڈیا سے گفتگو کرتے ہوئے بتایا کہ روس کا دورہ پہلے سے طے شدہ تھا، تاہم موجودہ حالات میں اس کی اہمیت بڑھ گئی ہے، کیونکہ ایران اور روس کئی بین الاقوامی معاملات پر مشترکہ موقف رکھتے ہیں۔

نیپرا نے آئندہ مالی سال کے لیے بجلی کے بنیادی اوسط ٹیرف میں 1 روپے 50 پیسے فی یونٹ کمی کی منظوری دے دی ہے، جس کے بعد نیا مجوزہ ٹیرف 34 روپے فی یونٹ ہوگا، تاہم اس کمی کا انحصار حکومت کی جانب سے دی جانے والی سبسڈی پر ہے۔ رواں مالی سال میں بنیادی ٹیرف 35 روپے 50 پیسے فی یونٹ ہے۔ بجلی کی تقسیم کار کمپنیوں کی ریونیو ضروریات کو مدنظر رکھتے ہوئے 3 ہزار 520 ارب روپے کی منظوری بھی دی گئی ہے۔ حکام کے مطابق یہ فیصلہ عوام پر مالی بوجھ میں کمی لانے کی غرض سے کیا گیا ہے۔ دوسری جانب سی پی پی اے نے نیپرا کو بجلی 10 پیسے فی یونٹ مہنگی کرنے کی درخواست جمع کرا دی ہے، جس پر 30 جون کو سماعت متوقع ہے۔ ادھر لاہور الیکٹرک سپلائی کمپنی (لیسکو) نے گزشتہ تین مالی سالوں کی کوارٹر ایڈجسٹمنٹس کی بنیاد پر صارفین سے 8 ارب روپے اضافی وصول کرنے کی اجازت حاصل کرلی ہے۔ لیسکو کی جانب سے 2019 سے 2022 تک مختلف ایڈجسٹمنٹ کے تحت نیپرا میں درخواست دائر کی گئی تھی، جس پر اتھارٹی نے سماعت کے بعد منظوری دی اور اب آئندہ مالی سال کے دوران صارفین کو بلوں کی مد میں یہ اضافی ادائیگیاں کرنی ہوں گی۔