وزیراعظم پاکستان شہباز شریف اور سعودی ولی عہد محمد بن سلمان کے درمیان ٹیلیفونک رابطہ ہوا جس میں دونوں رہنماؤں نے مشرق وسطیٰ کی تیزی سے بدلتی صورتحال پر تبادلہ خیال کیا۔ وزیراعظم شہباز نے سعودی عرب میں کامیاب حج انتظامات پر مبارکباد دیتے ہوئے حجاج کرام کی میزبانی پر سعودی حکومت کا شکریہ ادا کیا۔ انہوں نے شاہ سلمان بن عبدالعزیز کیلئے نیک تمناؤں کا اظہار کرتے ہوئے مسئلہ کشمیر، پانی، تجارت اور دہشتگردی جیسے اہم امور پر بھارت سے بامعنی مذاکرات کی آمادگی کا اعادہ کیا۔ وزیراعظم شہبازنے ایران اسرائیل تنازعے کے پرامن حل، اقوام متحدہ کے چارٹر کی پاسداری اور علاقائی امن کیلئے سعودی قیادت کی کوششوں کو سراہتے ہوئے سعودی عرب کی خودمختاری کی مکمل حمایت کی یقین دہانی بھی کرائی۔ ولی عہد محمد بن سلمان نے وزیراعظم شہباز شریف کی یکجہتی پر شکریہ ادا کرتے ہوئے مشرق وسطیٰ میں دیرپا امن کے قیام کے لیے سعودی عزم کا اعادہ کیا اور حالیہ تنازعے کے پرامن حل کے لیے پاکستان کے تعمیری کردار کو سراہا۔ اس سے قبل وزیراعظم نے قطر کے سفیر سے بھی ملاقات کی اور قطر میں امریکی فوجی اڈے پر حملوں کے بعد امیر قطر اور عوام سے مکمل یکجہتی کا اظہار کرتے ہوئے خطے میں پائیدار امن کیلئے سفارتی حل پر زور دیا۔ وزیراعظم نے قطر میں سلامتی کی صورتحال پر فوری رابطے پر قطری حکومت کے ردعمل کی بھی تعریف کی۔

قوم کے عظیم ہیرو میجر معیز ، جنہوں نے 2019 میں بھارتی پائلٹ ابھینندن کو گرفتار کیا تھا، جنوبی وزیرستان میں دہشتگردوں کے خلاف آپریشن کے دوران جام شہادت نوش کر گئے۔ آئی ایس پی آر کے مطابق 24 جون کو سیکیورٹی فورسز نے سرا روغہ کے علاقے میں خفیہ معلومات پر کارروائی کی، جس میں بھارت کے حمایت یافتہ “فتنہ الخوارج” کے 11 دہشتگردوں کو ہلاک اور 7 کو زخمی کر دیا گیا۔ آپریشن کی قیادت کرتے ہوئے میجر عباس اور لانس نائیک جبران اللہ شدید فائرنگ کے تبادلے میں شہید ہو گئے۔ 37 سالہ میجر معیز کا تعلق چکوال سے تھا جبکہ 27 سالہ لانس نائیک جبران اللہ کا تعلق ضلع بنوں سے تھا۔ میجر معیز کو ان کی بہادری اور خوارج کے خلاف کامیاب کارروائیوں کے لیے جانا جاتا تھا۔ آئی ایس پی آر نے بتایا کہ علاقے میں مزید دہشتگردوں کی تلاش کے لیے کلیئرنس آپریشن جاری ہے اور پاک فوج ملک سے بھارتی حمایت یافتہ دہشتگردی کے مکمل خاتمے کے لیے پرعزم ہے۔ ان عظیم سپوتوں کی قربانیاں قوم کے حوصلے کو مزید بلند کر رہی ہیں۔