پاکستان اسٹاک ایکسچینج میں آج مسلسل دوسرے دن بھرپور تیزی کا رجحان دیکھنے میں آیا، جس کے باعث کے ایس ای 100 انڈیکس ایک لاکھ 31 ہزار پوائنٹس کی نئی بلند ترین سطح پر پہنچ گیا۔پاکستان اسٹاک ایکسچینج کاروباری ہفتے کے آخری دن کا آغاز بھی مثبت انداز میں ہوا، جب 253 پوائنٹس کی تیزی کے ساتھ مارکیٹ کھلی اور انڈیکس 130,940 پوائنٹس پر آ گیا۔

کاروبار کے پہلے سیشن کے اختتام تک تیزی کا یہ سلسلہ برقرار رہا اور انڈیکس مزید 484 پوائنٹس بڑھ کر 131,171 پوائنٹس پر پہنچ گیا۔ اس کے بعد بھی اسٹاک مارکیٹ میں سرمایہ کاروں کا اعتماد برقرار رہا اور تیزی کا رجحان مزید گہرا ہوتا گیا، یہاں تک کہ 100 انڈیکس میں مجموعی طور پر 1145 پوائنٹس کا اضافہ ہوا اور مارکیٹ 131,832 پوائنٹس کی تاریخی سطح پر بند ہوئی۔

یاد رہے کہ گزشتہ روز بھی اسٹاک مارکیٹ میں شاندار تیزی دیکھی گئی تھی اور انڈیکس نے پہلی بار 131 ہزار پوائنٹس کی سطح عبور کرکے نئی تاریخ رقم کی تھی۔ مسلسل دو دن کی زبردست تیزی نے سرمایہ کاروں کے اعتماد کو مزید مستحکم کر دیا ہے۔

اسلام آباد سے موصولہ رپورٹ کے مطابق مالی سال 2024-25 میں پاکستان کے تنخواہ دار طبقے نے انکم ٹیکس کی مد میں 555 ارب روپے کی ریکارڈ رقم ادا کی، جو گزشتہ مالی سال کے مقابلے میں 188 ارب روپے یا 51 فیصد زیادہ ہے۔ فیڈرل بورڈ آف ریونیو (ایف بی آر) کے عبوری اعداد و شمار کے مطابق یہ ادائیگی اس قدر حیران کن ہے کہ یہ رقم ریٹیلرز اور رئیل اسٹیٹ سیکٹر سے جمع شدہ مجموعی ٹیکس سے دو گنا زیادہ ہے۔ تنخواہ دار افراد، جو نہ تو اپنے اخراجات کو ایڈجسٹ کر سکتے ہیں اور نہ ہی آمدنی چھپا سکتے ہیں، ان پر ٹیکس کا بوجھ اس حد تک بڑھا دیا گیا ہے کہ ان کی ٹیک ہوم تنخواہیں نمایاں طور پر کم ہو گئی ہیں۔ وزیراعظم شہباز شریف کی حکومت نے گزشتہ سال اس طبقے پر اضافی ٹیکس لگاتے ہوئے یہ دعویٰ کیا تھا کہ اس اقدام سے صرف 75 ارب روپے حاصل ہوں گے، مگر اصل رقم اس سے کہیں زیادہ نکلی۔ اس عدم توازن سے ایک بار پھر واضح ہو گیا ہے کہ بااثر شعبے اکثر ٹیکس نظام سے بچ نکلتے ہیں، جبکہ خاموش اور منظم طریقے سے ٹیکس دینے والے افراد پر مزید بوجھ ڈال دیا جاتا ہے۔ البتہ، حالیہ بجٹ میں حکومت نے سالانہ 3.2 ملین روپے کمانے والے تنخواہ دار افراد پر تھوڑا سا ٹیکس ریلیف دیتے ہوئے کہا ہے کہ اس سے 56 ارب روپے کا ریلیف فراہم کیا جائے گا۔