اسلام آباد: وفاقی حکومت نے ملک میں چینی کی طلب پوری کرنے اور قیمتوں میں استحکام برقرار رکھنے کے لیے 85 ہزار میٹرک ٹن چینی درآمد کرنے کا فیصلہ کیا ہے۔ اس مقصد کے لیے سوکار کے ذریعے لیٹر آف کریڈٹ (ایل سیز) قائم کر دیے گئے ہیں اور تمام ایل سیز باقاعدہ طور پر کھول کر متعلقہ بینکوں کو بھجوا دی گئی ہیں۔ معاہدے کے تحت چینی کی یہ کھیپ مرحلہ وار پاکستان لائی جائے گی اور پہلی کھیپ آئندہ چند ہفتوں میں بندرگاہ پر پہنچنے کی توقع ہے۔ وفاقی حکومت نے یہ اقدام مقامی ذخائر میں اضافے اور مستقبل میں کسی ممکنہ قلت یا قیمتوں میں غیر معمولی اتار چڑھاؤ کو روکنے کے لیے اٹھایا ہے۔ منصوبے کے مطابق درآمدی چینی اوپن مارکیٹ میں رعایتی نرخوں پر عوام کو فراہم کی جائے گی، جس سے سپلائی کا تسلسل قائم رہے گا۔ اس کے علاوہ درآمدی چینی کو عالمی معیار کے تقاضوں پر پورا اتارنے اور مقررہ وقت پر ملک پہنچانے کو بھی یقینی بنایا جائے گا۔

اسلام آباد: حکومت کی جانب سے آج پیٹرولیم مصنوعات کی قیمتوں میں ردوبدل کا امکان ہے۔ اوگرا نے قیمتوں میں ردوبدل کی سمری حکومت کو ارسال کر دی ہے جس کے مطابق پیٹرول کی قیمت میں 1 روپے 40 پیسے فی لیٹر اضافے جبکہ ہائی اسپیڈ ڈیزل میں 11 روپے 50 پیسے فی لیٹر کمی کا امکان ہے۔ نئی قیمتوں کا اطلاق آج رات 12 بجے سے ہوگا۔

عالمی منڈی میں خام تیل کی قیمتیں جمعہ کو تقریباً 2 فیصد بڑھ کر ایک ہفتے کی بلند ترین سطح پر پہنچ گئیں۔ برینٹ کروڈ 1.21 ڈالر بڑھ کر 66.84 ڈالر فی بیرل اور امریکی ویسٹ ٹیکساس انٹرمیڈیٹ 1.31 ڈالر اضافے کے بعد 63.96 ڈالر فی بیرل پر بند ہوا۔ قیمتوں میں یہ بحالی ذخائر و سپلائی میں کمی اور امریکی فیڈرل ریزرو کی جانب سے شرح سود میں کمی کے امکانات کے باعث ہوئی ہے