بالی ووڈ کی مشہور اداکارہ اور سابقہ مس یونیورس سشمیتا سین نے ایک حالیہ انٹرویو میں اپنی بیٹی گود لینے کی کہانی سناتے ہوئے بتایا کہ انہیں قانونی اور سماجی رکاوٹوں کا سامنا کرنا پڑا۔
انہوں نے کہا کہ سن 2000 میں جب وہ صرف 24 سال کی تھیں، تو انہوں نے پہلی بیٹی رینی کو گود لینے کا فیصلہ کیا — حالانکہ اس وقت غیر شادی شدہ خواتین کے لیے یہ ایک غیر معمولی قدم سمجھا جاتا تھا۔

سشمیتا سین نے بتایا کہ جب وہ عدالت میں بچی کو گود لینے کا مقدمہ لے کر گئیں تو انہیں ڈر تھا کہ اگر فیصلہ ان کے خلاف آیا تو رینی ان سے واپس لے لی جائے گی۔ ان کے والد شوبیر سین نے اس موقع پر غیر معمولی تعاون کیا اور اپنی جائیداد کا نصف حصہ رینی کے نام کر دیا تاکہ قانونی شرط پوری ہو سکے۔

اداکارہ نے مزید بتایا کہ عدالت کے جج نے ان کے والد سے کہا،

“اگر آپ بیٹی کو گود لینے دیں گے تو اس سے کوئی اچھا لڑکا شادی نہیں کرے گا۔”
جس پر والد نے جواب دیا،
“میں نے اپنی بیٹی کو کسی کی بیوی بننے کے لیے نہیں بلکہ خود مختار انسان بننے کے لیے پالا ہے۔”

عدالت کے فیصلے کے بعد سشمیتا سین بھارت کی پہلی سنگل مدر بننے والی مشہور شخصیت بن گئیں۔ چند سال بعد انہوں نے دوسری بیٹی علیشہ کو بھی گود لیا۔

لاس اینجلس:
آسکر ایوارڈ یافتہ امریکی اداکارہ ڈائنا کیٹن 79 برس کی عمر میں انتقال کر گئیں۔

خبر ایجنسی کے مطابق خاندانی ترجمان نے تصدیق کی کہ ڈائنا کیٹن ہفتہ کے روز کیلیفورنیا میں انتقال کر گئیں۔ ڈائنا کیٹن نے اپنے فنی کیریئر میں مشہور ہدایتکار ووڈی ایلن کے ساتھ کئی یادگار فلموں میں کام کیا۔

ڈائنا کیٹن کا اصل نام ڈیان ہال تھا۔ وہ 1946 میں لاس اینجلس میں پیدا ہوئیں اور چار بہن بھائیوں میں سب سے بڑی تھیں۔ ان کے والد سول انجینئر جبکہ والدہ گھریلو خاتون تھیں جنہوں نے اپنی تخلیقی صلاحیتوں سے بیٹی پر گہرا اثر ڈالا۔