پاکستان کی معروف اداکارہ سجل علی کو حالیہ دنوں اپنے نئے ڈرامے میں اپنی منگنی کا جوڑا دوبارہ استعمال کرنے پر سوشل میڈیا پر شدید تنقید کا سامنا ہے۔ اس ڈرامے کا ٹیزر جاری ہوتے ہی نہ صرف سجل علی اور ہمائیوں سعید کے درمیان عمر کے نمایاں فرق پر تبصرے شروع ہوئے بلکہ سجل کے پہنے گئے لباس نے بھی صارفین کی توجہ حاصل کر لی۔ متعدد افراد نے اس عمل کو محض سستی شہرت حاصل کرنے کی کوشش قرار دیا، جبکہ بعض نے اسے مضحکہ خیز اور غیر ضروری قرار دیا۔ ایک صارف نے طنزیہ انداز میں کہا کہ سجل شاید اپنے پرانے کپڑوں کو ضائع ہونے سے بچانے کے مشن پر ہیں۔

تاہم اس تنقید کے برعکس، کئی صارفین سجل کے حق میں بھی سامنے آئے اور اس بات پر زور دیا کہ کسی بھی فنکار کے لباس کا انتخاب اس کا ذاتی فیصلہ ہے، اور اس پر تنقید غیر مناسب ہے۔ کچھ لوگوں نے یہ بھی یاد دلایا کہ ماضی میں بھی کئی اداکارائیں ذاتی زندگی سے جڑے ملبوسات کو اپنے کرداروں میں استعمال کر چکی ہیں۔

واضح رہے کہ سجل علی نے 2020 میں احد رضا میر سے شادی کی تھی جو بعد ازاں 2022 میں اختتام پذیر ہوئی۔ مزید دلچسپ بات یہ ہے کہ سجل کے اس نئے ڈرامے میں احد کے والد آصف رضا میر بھی اہم کردار میں شامل ہیں، جس سے مداحوں کو ماضی کی یاد تازہ ہو گئی ہے

آج دنیا بھر میں یومِ عالمی موسیقی 2025 منایا جا رہا ہے، جس کا موضوع “ہیلنگ تھرو ہارمنی” رکھا گیا ہے۔ اس دن کو منانے کا مقصد دنیا کے مختلف طبقات اور اقوام کو موسیقی کے ذریعے امن، محبت اور جذباتی سکون کا پیغام دینا ہے۔ ہر سال 21 جون کو موسیقی کے عالمی دن کے طور پر منایا جاتا ہے، جس کے دوران مختلف طرز کی موسیقی کو عوامی مقامات، پارکوں اور گلیوں میں بغیر کسی معاوضے کے پیش کیا جاتا ہے تاکہ ہر شخص موسیقی کی خوبصورتی سے لطف اندوز ہو سکے۔ یومِ عالمی موسیقی 2025 موقع پر 120 سے زائد ممالک میں موسیقار اپنی فنکاری پیش کرتے ہیں، اور عوام نہ صرف سامع بنتے ہیں بلکہ خود بھی حصہ لیتے ہیں۔ یومِ موسیقی کا آغاز 1982 میں فرانس کے وزیر ثقافت جیک لینگ اور موسیقی کے صحافی موریس فلورے نے کیا تھا، جنہوں نے موسیقی کو گھروں سے نکال کر سڑکوں تک لانے کا خواب دیکھا تھا۔ برصغیر میں موسیقی کی جڑیں انتہائی گہری ہیں، جہاں کلاسیکل موسیقی، غزل، گیت، لوک دھنیں اور فلمی گائیکی کو خاص مقام حاصل ہے۔ موسیقی کو روح کی غذا کہا جاتا ہے، اور امیر خسرو، تان سین، نصرت فتح علی خان، نازیہ حسن جیسے لیجنڈری فنکاروں نے اس فن کو عالمی سطح پر پہچان دلائی۔ رواں برس کا موضوع “ہیلنگ تھرو ہارمنی” اس بات پر زور دیتا ہے کہ موسیقی نہ صرف تفریح بلکہ ذہنی سکون، جذباتی اظہار اور معاشرتی ہم آہنگی کا ذریعہ بھی ہے