دنیا بھر میں مقبول نیٹ فلکس کی کورین سیریز ‘اسکوئڈ گیم’ کے تیسرے اور آخری سیزن نے ریلیز کے فوری بعد ایک نیا عالمی ریکارڈ قائم کر دیا ہے۔ غیر ملکی میڈیا رپورٹس کے مطابق، ‘اسکوئڈ گیم’ سیزن 3 کو 27 جون 2025 کو ریلیز کیا گیا، اور محض ابتدائی 72 گھنٹوں میں اس سیزن کو دنیا بھر میں 6 کروڑ 10 لاکھ بار دیکھا گیا، جو نیٹ فلکس کی تاریخ میں کسی بھی غیر انگریزی زبان میں بننے والی سیریز کی سب سے بڑی اوپننگ بن گئی ہے۔

یہ سیزن 93 ممالک میں ٹاپ رینکنگ پر پہنچا، اور غیر انگریزی سیریز میں نویں سب سے زیادہ دیکھی جانے والی سیریز کا اعزاز حاصل کیا۔ نئے سیزن میں شامل گیمز پچھلے سیزنز کی نسبت کہیں زیادہ سخت اور پرتشدد دکھائے گئے، جس پر ناظرین کی آرا مختلف رہیں۔ بعض نے ان مناظر کو حقیقت سے قریب تر اور سنسنی خیز قرار دیا، جبکہ دیگر نے اسے حد سے زیادہ پُر تشدد سمجھا۔

سیریز کے ہدایتکار ہوانگ ڈونگ ہیوک کا کہنا ہے کہ اس بار کہانی انسانی امید، اخلاقی کشمکش اور مشکل فیصلوں کے گرد گھومتی ہے، اور اسے پہلے سے زیادہ گہرائی اور بہتر انداز میں پیش کیا گیا ہے۔

پاکستان شوبز انڈسٹری کی سینئر اداکارہ بشریٰ انصاری نے اپنے حالیہ ویلاگ میں ہانیہ عامر کی اداکاری کو سراہتے ہوئے بھارتیوں کے منفی رویے پر کڑی تنقید کی ہے۔ بشریٰ نے ہانیہ کو ایک محنتی اور پیشہ ور اداکارہ قرار دیا جو ہر موسم اور حالات میں اپنے کام سے مخلص رہتی ہے۔ ان کا کہنا تھا کہ گرمی ہو یا سردی، ہانیہ کبھی اپنی پرفارمنس پر سمجھوتہ نہیں کرتی۔ ہانیہ عامر ان دنوں بھارتی پنجابی فلم سردار جی 3 میں گلوکار دلجیت دوسانجھ کے ساتھ کام کر رہی ہیں، جس پر بھارتی سوشل میڈیا صارفین کی جانب سے ملے جلے ردعمل کا اظہار کیا گیا ہے۔

بشریٰ انصاری نے سوال اٹھایا کہ جب ہانیہ نے فلم سائن کی، تب تو سب ٹھیک تھا، اب اچانک اس بچگانہ ردعمل کی کیا وجہ ہے؟ کیا ایک نوجوان پاکستانی اداکارہ سے خطرہ محسوس ہو رہا ہے؟ انہوں نے ماضی میں فواد خان کے ساتھ بھارت میں ہونے والے سلوک کی بھی یاد دہانی کروائی۔ اس کے ساتھ ساتھ انہوں نے پہلگام واقعے کو “منصوبہ بندی” قرار دیا اور بھارتی وزیر اعظم نریندر مودی پر الزام لگایا کہ وہ پاک-بھارت اتحاد نہیں چاہتے۔