پاکستان تحریک انصاف کے چیئرمین بیرسٹر گوہر نے واضح کیا ہے کہ وزیراعلیٰ خیبرپختونخوا علی امین گنڈاپور کے خلاف تحریک عدم اعتماد کسی صورت کامیاب نہیں ہو سکتی، اپوزیشن جماعتیں صرف اپنا شوق پورا کر لیں، ہم پوری طاقت سے اس کا مقابلہ کریں گے۔ جیو نیوز کے پروگرام میں گفتگو کرتے ہوئے بیرسٹر گوہر نے کہا کہ خیبرپختونخوا اسمبلی کے تمام پی ٹی آئی ارکان علی امین گنڈاپور کے ساتھ مضبوطی سے کھڑے ہیں، سنی اتحاد کونسل کے ٹکٹ پر منتخب ایم پی ایز میں سے کوئی بھی پارٹی چھوڑ کر نہیں جائے گا۔

انہوں نے سپریم کورٹ کے مخصوص نشستوں سے متعلق فیصلے پر مایوسی کا اظہار کرتے ہوئے کہا کہ الیکشن کمیشن نے پی ٹی آئی کو دی جانے والی مخصوص نشستیں بعد میں دیگر جماعتوں کو دے دیں، حالانکہ ہم نے 19 فروری کو باقاعدہ درخواست جمع کرائی تھی۔ ان کا کہنا تھا کہ 8 فروری کو انتخابات ہوئے، 15 فروری کو نتائج کا نوٹیفکیشن جاری ہوا اور 22 فروری کو الیکشن کمیشن کو مخصوص نشستیں الاٹ کرنی تھیں۔

گوہر خان کے مطابق مخصوص نشستوں کی تقسیم کے نتیجے میں ن لیگ، پیپلز پارٹی اور جے یو آئی جیسی جماعتوں کو ان کی جیتی ہوئی نشستوں سے بھی زیادہ مخصوص نشستیں مل گئی ہیں، جو قانون اور انصاف کے اصولوں کے خلاف ہے۔ انہوں نے کہا کہ پی ٹی آئی اسٹیٹس کو کے خلاف اور آئین و قانون کے ساتھ کھڑی ہے، اور ہر غیر آئینی اقدام کا بھرپور مزاحمت سے مقابلہ کرے گی۔

تحریک انصاف کے سیکریٹری اطلاعات شیخ وقاص اکرم نے پریس کانفرنس کے دوران شدید ردعمل کا اظہار کرتے ہوئے کہا ہے کہ 8 فروری کے عام انتخابات میں پی ٹی آئی کا پہلا مینڈیٹ چوری کیا گیا اور دوسرا مخصوص نشستوں سے متعلق عدالتی فیصلے کے ذریعے ہتھیا لیا گیا، جس نے یہ ثابت کر دیا کہ ملک میں آئین اور قانون کی حکمرانی ختم ہو چکی ہے۔ ان کا کہنا تھا کہ اسٹیبلشمنٹ اور پی ڈی ایم کی ملی بھگت سے عمران خان کی حکومت گرائی گئی، سندھ ہاؤس میں ضمیروں کی منڈی سجی اور جب عمران خان نے دو صوبائی حکومتیں قربان کیں تو 90 روز میں الیکشن بھی نہیں کروائے گئے۔

شیخ وقاص نے الزام لگایا کہ انتخابات کے دوران تحریک انصاف کے امیدواروں کو نامزدگی کے مرحلے میں ہی رکاوٹوں کا سامنا رہا، کاغذات نامزدگی چھینے گئے، اس کے باوجود پی ٹی آئی نے 180 نشستیں جیتیں، مگر صرف 17 سیٹیں حاصل کرنے والی جماعت کو 110 نشستیں دے کر اقتدار سونپ دیا گیا۔ انہوں نے کہا کہ موجودہ نظام مفلوج ہو چکا ہے، اور مخصوص نشستوں کے فیصلے نے صرف پی ٹی آئی کو نہیں بلکہ پوری قوم کی امنگوں کو کچل کر رکھ دیا ہے۔

انہوں نے چیف جسٹس قاضی فائز عیسیٰ پر کڑی تنقید کرتے ہوئے کہا کہ ان کی غیر جانبداری پہلے ہی ختم ہو چکی تھی، اور وہ عدلیہ کی تاریخ کے پہلے جج ہیں جنہوں نے عدلیہ کو سیاسی انتقام کے لیے استعمال کیا۔ ترجمان کا کہنا تھا کہ عمران خان جیسے عظیم لیڈر کو کال کوٹھری میں بند کر دیا گیا ہے، سینکڑوں مقدمات اور وکلاء کے باوجود ان کی بیوی تک سے ملاقات کی اجازت نہیں دی جاتی، ملاقات کے لیے آنے والے عوامی نمائندوں کو بھی روک دیا جاتا ہے، جس سے ظاہر ہوتا ہے کہ ریاست خوفزدہ ہو چکی ہے اور عمران خان کے کسی ممکنہ پیغام سے خائف ہے جو عوام کو ایک بار پھر سڑکوں پر لا سکتا ہے۔