پنجاب حکومت نے صوبے میں ماحولیاتی تحفظ اور روزگار کے مواقع پیدا کرنے کیلئے ای ٹیکسی سروس شروع کرنے کا فیصلہ کیا ہے۔ اس منصوبے کے تحت ابتدائی طور پر لاہور میں 1100 الیکٹرک گاڑیاں دستیاب ہوں گی، جن کے لیے ورکنگ پیپر تیار کرلیا گیا ہے۔ ذرائع کے مطابق وزیراعلیٰ پنجاب مریم نواز نے ای ٹیکسی منصوبے کی منظوری دے دی ہے اور جاپان سے واپسی پر وہ اس منصوبے کا باقاعدہ افتتاح کریں گی۔ حکومت نے فیصلہ کیا ہے کہ الیکٹرک گاڑیوں کے لیے 65 لاکھ روپے تک کی فنانسنگ فراہم کی جائے گی، جبکہ 20 فیصد ڈاؤن پیمنٹ کی مد میں تقریباً 5 لاکھ 85 ہزار روپے حکومت برداشت کرے گی۔ اس منصوبے کے تحت 7 مختلف اقسام کی 40 لاکھ سے ایک کروڑ روپے مالیت کی گاڑیاں شہریوں کو مہیا کی جائیں گی، جن میں سے 1100 گاڑیاں چین سے درآمد کی جائیں گی۔ پنجاب حکومت اس پروجیکٹ پر تقریباً 2 ارب روپے خرچ کرے گی اور بینک بھی گاڑیوں کی فنانسنگ میں شامل ہوں گے۔ دوسری جانب وفاقی حکومت نے بھی ملک میں الیکٹرک گاڑیوں کے فروغ کیلئے پانچ سالہ سبسڈی سکیم کی منظوری دی ہے، جس کے تحت 100 ارب روپے کی لاگت سے ایک لاکھ 16 ہزار الیکٹرک موٹر سائیکلیں اور 3 ہزار سے زائد الیکٹرک رکشے و لوڈر فراہم کیے جائیں گے، تاکہ تیل کی درآمدات میں کمی اور ماحول دوست ٹرانسپورٹ کو فروغ دیا جا سکے۔

معروف صحافی و تجزیہ کار سہیل وڑائچ نے اپنے حالیہ کالم میں فیلڈ مارشل عاصم منیر سے ہونے والی ملاقات کا احوال بیان کیا ہے۔ ان کے مطابق جنرل عاصم منیر نے واضح کیا کہ صدر یا وزیراعظم کی تبدیلی کی افواہیں بالکل بے بنیاد ہیں اور ان کے پیچھے صرف وہ عناصر ہیں جو سیاسی انارکی پھیلانا چاہتے ہیں۔ برسلز میں ہونے والی اس گفتگو کے دوران آرمی چیف نے کہا کہ سیاسی مصالحت صرف سچے دل سے معافی مانگنے سے ہی ممکن ہے اور یہی رویہ معاشرے میں ہم آہنگی لا سکتا ہے۔ انہوں نے وزیراعظم شہباز شریف کے عزم اور محنت کو سراہتے ہوئے کہا کہ جنگ کے دنوں میں سول حکومت نے بہترین تدبر کا مظاہرہ کیا۔

فیلڈ مارشل عاصم منیر نے معیشت کے حوالے سے ایک مکمل روڈ میپ پیش کرتے ہوئے بتایا کہ ریکوڈک منصوبے سے اگلے سال سے ہر سال دو ارب ڈالر حاصل ہوں گے، جس سے پاکستان قرضوں سے نجات پا سکتا ہے اور خوشحال ممالک کی صف میں شامل ہو سکتا ہے۔ انہوں نے واضح کیا کہ پاکستان اپنے تعلقات میں چین اور امریکہ کے درمیان توازن برقرار رکھے گا اور بھارت کو بھی خبردار کیا کہ پاکستان کے امن کو نقصان پہنچانے کی کوششوں کا بھرپور جواب دیا جائے گا۔ افغان حکومت کو بھی متنبہ کیا گیا کہ طالبان کو پاکستان کی سرزمین میں دھکیلنے کی روش ترک کی جائے۔

سہیل وڑائچ کے مطابق جنرل عاصم منیر انتہائی عاجزی کے ساتھ اوورسیز پاکستانیوں سے ملتے رہے، ہر شخص سے مصافحہ کیا اور سوالوں کے جواب دیے۔ ان کے چہرے پر مسکراہٹ نمایاں تھی اور وہ بار بار اس بات پر زور دیتے رہے کہ پاکستان میں سویلین نظام چلنا چاہیے اور اسے مصالحت اور مصلحت کے ذریعے مزید مضبوط بنایا جانا چاہیے تاکہ ملک کو استحکام مل سکے۔