پاکستان پر بھارتی حملوں کے بعد جہاں حکومتی و عسکری ردعمل سامنے آیا، وہیں پاکستان کے شوبز ستارے بھی خاموش نہ رہے۔ معروف اداکارہ ماہرہ خان، جو بھارتی فلم میں شاہ رخ خان کے ساتھ کام کر چکی ہیں، نے بھارتی حملے کو “بزدلانہ اقدام” قرار دیتے ہوئے کہا کہ “ہم اس مشکل وقت میں اپنی قوم کے ساتھ کھڑے ہیں۔”

اداکار بلال عباس خان نے بھی معصوم جانوں کے ضیاع پر دکھ کا اظہار کرتے ہوئے کہا کہ “پاکستانی قوم پہلے سے زیادہ متحد ہے۔”

ماورا حسین، جنہوں نے بھارتی فلم صنم تیری قسم میں مرکزی کردار نبھایا، نے حالیہ بھارتی جارحیت کی مذمت کرتے ہوئے متاثرہ خاندانوں سے ہمدردی کا اظہار کیا۔

گلوکار و اداکار فرحان سعید نے پاکستان کی آزادی کو غنیمت قرار دیتے ہوئے قائداعظم کا شکریہ ادا کیا۔

اداکارہ عروہ حسین نے بھارت کی جانب سے جھوٹے پروپیگنڈے اور کشیدگی کو بڑھانے کی کوشش کو “انا کی جنگ” قرار دیا۔

اداکار منیب بٹ نے اپنے ویڈیو بیان میں دنیا کو یاد دلایا کہ “پاکستان ایک ایٹمی طاقت ہے اور دشمن کو یہ بھولنے نہیں دیں گے۔”

بھارت میں مقبول اداکارہ ہانیہ عامر نے بھارتی کارروائی کو شرمناک اور بزدلانہ قرار دیا، جبکہ اداکار اسامہ خان نے موجودہ صورتحال پر شدید مایوسی کا اظہار کیا۔

پاکستانی فنکاروں کی یہ آواز قوم کے جذبے کو تقویت دے رہی ہے اور امن کے ساتھ ملکی خودمختاری کے دفاع کے عزم کا اظہار ہے۔

پاکستانی حکام نے حالیہ پاک بھارت کشیدگی کے تناظر میں بھارتی فلموں کو نمائش کی اجازت دینے کے لیے این او سی جاری کرنے کا عمل معطل کر دیا ہے۔ اس فیصلے کا اطلاق تمام بھارتی فلموں پر ہوگا، جن میں بالی ووڈ اور بھارتی پنجابی فلمیں بھی شامل ہیں۔

ذرائع کے مطابق، کئی فلموں کی این او سی درخواستیں سرکاری دفاتر میں زیر التوا ہیں، جن پر اب مزید کارروائی نہیں کی جائے گی۔ یہ فیصلہ اس لیے کیا گیا ہے تاکہ عوامی جذبات کو مدِنظر رکھا جائے اور ممکنہ عوامی ردِعمل سے بچا جا سکے۔

حکام کا کہنا ہے کہ موجودہ حالات میں دشمن ملک کی فلمیں پاکستان میں دکھانا نامناسب ہوگا، لہٰذا یہ قدم وقتی طور پر اُٹھایا گیا ہے۔