وزیراعظم شہباز شریف نے کہا ہے کہ عوامی وسائل کا نقصان کرنے والے اداروں میں مزید زیاں کی اجازت نہیں دوں گا۔ تفصیلات کے مطابق، اسلام آباد میں سرکاری اداروں کی نجکاری کے عمل اور اس کی نگرانی کے حوالے سے ایک جائزہ اجلاس منعقد ہوا، جس کی صدارت وزیراعظم شہباز شریف نے کی۔ اس اجلاس میں وفاقی وزرا عبدالعلیم خان، محمد اورنگزیب، رانا تنویر حسین، احد خان چیمہ اور دیگر اعلیٰ حکام نے شرکت کی۔
اجلاس میں وزیراعظم کو نجکاری کے حوالے سے بنائے گئے ٹاسک مینجمنٹ سسٹم کا جائزہ پیش کیا گیا۔ متعلقہ حکام نے مختلف اداروں کی نجکاری کی معینہ مدت کے بارے میں آگاہ کرتے ہوئے بتایا کہ وفاقی حکومت کے اداروں کی نجکاری کو تین مراحل میں تقسیم کیا گیا ہے: پہلے مرحلے میں 10، دوسرے مرحلے میں 13 اور تیسرے مرحلے میں باقی ماندہ اداروں کی نجکاری کی جائے گی۔

وزیراعظم نے نجکاری کے عمل کو تیز کرنے اور معینہ مدت میں مکمل کرنے کی ہدایت کی، اور کہا کہ پاکستان کی ترقی کے لیے سب کو مل کر کام کرنا ہوگا۔ انہوں نے مزید کہا کہ عوامی وسائل کا نقصان کرنے والے اداروں میں مزید زیاں کی اجازت نہیں دوں گا، اور بروقت ضروری اصلاحات ہی معیشت کی بہتری کی جانب تیزی سے گامزن کر سکتی ہیں۔

ایس آئی ایف سی کی مدد سے غیر ملکی سرمایہ کاری میں ایک اہم سنگ میل عبور کر لیا گیا ہے۔

اسپیشل انویسٹمنٹ فیسلٹی کونسل کی پالیسی کے تحت غیر ملکی سرمایہ کاری کے فروغ کے لیے حکومتی اقدامات کے نتیجے میں رواں مالی سال کے پہلے نصف میں غیر ملکی سرمایہ کاری میں 20 فیصد اضافہ ہوا، جو کہ 1.329 ارب ڈالر تک پہنچ گیا۔

ہانگ کانگ، برطانیہ اور سوئٹزرلینڈ کی اہم سرمایہ کاری کے علاوہ چین کا سرمایہ کاری میں 40 فیصد تک نمایاں حصہ ہے۔ عالمی اقتصادی فورم اور ڈیجیٹل کوآپریشن آرگنائزیشن کے مشترکہ منصوبے کے تحت ڈیجیٹل غیر ملکی سرمایہ کاری کا آغاز بھی اسی سلسلے کی ایک کڑی ہے۔

وزیرِ اعظم کی جانب سے ڈیجیٹل غیر ملکی براہِ راست سرمایہ کاری منصوبے کو اقتصادی ترقی کی جانب ایک اہم قدم قرار دیا جا رہا ہے۔ اس میں ای کامرس، سافٹ ویئر ڈویلپمنٹ، آئی ٹی انفراسٹرکچر، اور آن لائن سروسز شامل ہیں۔

عالمی اقتصادی فورم کے تحت پاکستان ڈیجیٹل غیر ملکی براہِ راست سرمایہ کاری منصوبہ اپنانے والا پہلا ملک بن گیا ہے۔ ڈیجیٹل ایف ڈی آئی کی جانب پیشرفت جدید ٹیکنالوجی میں ترقی کے ساتھ ساتھ عالمی مہارت، جدت اور استحکام کا ایک اہم ذریعہ ہے۔

اس منصوبے کا مقصد ایس آئی ایف سی کی سہولت کاری سے پاکستان میں سرحد پار ڈیجیٹل سرمایہ کاری کو فروغ دینا ہے۔