حکومت کی انرجی ٹاسک فورس نے مبینہ طور پر 1994 اور 2002 کی پاور پالیسیوں کے تحت قائم ہونے والے تقریبا ایک درجن انڈیپینڈنٹ پاور پروڈیوسرز (آئی پی پیز) کے ساتھ نظر ثانی شدہ پاور پرچیز ایگریمنٹ (پی پی اے) پر دستخط کر دیے ہیں۔

وزیرِ توانائی سردار اویس خان لغاری کی سربراہی میں قائم۔ کی گئی ٹاسک فورس میں معاون خصوصی برائے توانائی محمد علی، نیشنل کوآرڈینیٹر لیفٹیننٹ جنرل محمد ظفر اقبال، چیئرمین نیپرا، سی ای او سی پی پی اے-جی، مینجنگ ڈائریکٹر پی پی آئی بی اور نیپرا، سی پی پی اے-جی اور ایس ای سی پی کے ماہرین شامل ہیں، 1994 اور 2002 کی پاور پالیسیوں کے تحت قائم کردہ آئی پی پیز کے ساتھ ’سخت مذاکرات‘ کررہی ہے۔ کچھ آئی پی پیز اب بھی اپنے منافع میں کمی، ماضی کے مالی فوائد اور تاخیر سے ادائیگی پر سود میں کمی کی تجاویز کے خلاف مزاحمت پیش کررہے ہیں۔

ذرائع کے مطابق جب آئی پی پیز کے نمائندوں کو ان کی بے ضابطگیوں کے ثبوت پر مشتمل ”فائلیں“ پیش کی جاتی ہیں اور نئے معاہدوں کی پیشکش سامنے رکھی جاتی ہے، تو وہ ابتداء کچھ مزاحمت کرتے ہیں لیکن غیر قانونی مالی فوائد کے شواہد دیکھنے کے بعد ان تجاویز پر راضی ہوجاتے ہیں۔

ایک سرکاری عہدیدار کا کہنا ہے کہ سب کچھ ٹھیک چل رہا ہے۔ روزانہ ملاقاتیں بھی ہو رہی ہیں۔ 8 معاہدےبھی ہو چکے ہیں، باقی آئندہ دو ہفتوں میں مکمل ہونے کا امکان ہے، اس کے بعد 1994 اور 2002 کے پلانٹس سے فارغ ہو کر حکومت اور 2006 کی پالیسی کے تحت پلانٹس پر توجہ دی جائے گی گے۔“ البتہ، مزید دو یا تین آئی پی پیز نے معاہدوں پر دستخط بھی کردیے ہیں۔