وزیراعظم کے مشیر برائے سیاسی امور رانا ثناءاللہ نے کہا ہے کہ اگر بھارت پہلگام واقعے پر مشترکہ تحقیقات چاہتا ہے تو پاکستان اس کی غیر جانبدارانہ انکوائری کے لیے تیار ہے۔ انہوں نے خبردار کیا کہ بھارت کا رویہ پورے خطے کے امن کے لیے خطرہ بن رہا ہے۔

ایک پروگرام میں گفتگو کرتے ہوئے رانا ثناءاللہ نے کہا کہ پہلگام واقعے کو جس انداز میں بھارت نے رپورٹ کیا ہے، اس پر ہمیں شدید تحفظات ہیں۔ بھارت اس واقعے کو اپنے مذموم مقاصد کے لیے استعمال کرنا چاہتا ہے۔ انہوں نے کہا کہ پہلگام واقعے کے فوری بعد بھارت کی جانب سے سندھ طاس معاہدہ معطل کرنا اس بات کا ثبوت ہے کہ یہ سب ایک منظم منصوبہ بندی کا حصہ تھا۔

رانا ثناءاللہ نے مزید کہا کہ اگر تھرڈ پارٹی، جیسے اقوام متحدہ یا کوئی اسپیشل ایکسپرٹ، پہلگام واقعے کی انکوائری کرے تو پاکستان اس کے لیے مکمل تیار ہے۔ ہمیں یہ جاننے کی ضرورت ہے کہ اس گھناؤنے عمل میں کون لوگ ملوث ہیں۔ ان کا کہنا تھا کہ بھارت کی نیت صاف نہیں، وہ اس واقعے کو جواز بنا کر خطے میں عدم استحکام پیدا کرنا چاہتا ہے۔

انہوں نے واضح کیا کہ کشمیری عوام کو آج تک ان کا حق خودارادیت نہیں دیا گیا اور بھارت انسانی حقوق کی سنگین خلاف ورزیاں کر رہا ہے۔ پاکستان امن کا خواہاں ہے، لیکن اگر بھارت نے کسی قسم کی جارحیت کی کوشش کی تو اس کا منہ توڑ جواب دیا جائے گا۔

ایک اور پروگرام میں گفتگو کرتے ہوئے رانا ثناءاللہ نے کہا کہ اگر ضرورت محسوس ہوئی تو آل پارٹیز کانفرنس یا پارلیمنٹ کا مشترکہ اجلاس بھی بلایا جا سکتا ہے، اور اس موقع پر تمام سیاسی جماعتیں متحد ہوکر ملکی سالمیت کا دفاع کریں گی۔ انہوں نے اس امید کا اظہار کیا کہ پی ٹی آئی بھی قومی مفاد میں آل پارٹیز کانفرنس میں شریک ہوگی۔

رانا ثناءاللہ نے کہا کہ ہماری امن کی باتوں کو کمزوری نہ سمجھا جائے، ہم اپنی خودمختاری، سالمیت اور قوم کے تحفظ کے لیے ہر حد تک جانے کے لیے تیار ہیں۔ ملک کی تمام سیاسی جماعتیں، عوام اور افواج پاکستان یکجہتی کا مظاہرہ کر رہے ہیں اور دشمن کو بھرپور جواب دینے کی صلاحیت رکھتے ہیں۔