پاکستانی ریپر طلحہ انجم ایک حالیہ کنسرٹ کے دوران پیش آنے والے متنازع واقعے کے باعث خبروں کی زینت بن گئے ہیں۔ سوشل میڈیا پر وائرل ہونے والی ویڈیو میں دیکھا جا سکتا ہے کہ طلحہ انجم اسٹیج پر پرفارم کر رہے تھے جب اچانک وہ ہجوم میں کسی شخص کی طرف اشارہ کرتے ہیں، جس کے بعد اسے اسٹیج کی طرف گھسیٹ کر لایا جاتا ہے۔

رپورٹس کے مطابق یہ واقعہ اس وقت پیش آیا جب ہجوم میں موجود ایک شخص نے طلحہ انجم کی طرف بوتل پھینکی، اور طلحہ نے ردِعمل کے طور پر اُسی شخص کو اسٹیج پر بلایا۔ ویڈیو میں طلحہ اور ان کے ساتھ موجود ایک اور شخص کو دیکھا جا سکتا ہے جو مبینہ طور پر اس شخص کو بالوں سے پکڑ کر اسٹیج پر گھسیٹتے ہیں۔ بعد ازاں سیکیورٹی اہلکار مداخلت کرتے ہوئے اسے بیک اسٹیج لے جاتے ہیں۔

یہ واقعہ سوشل میڈیا پر بحث کا موضوع بن گیا ہے۔ کچھ صارفین طلحہ انجم کے رویے کو غیر اخلاقی، غیر پیشہ ورانہ اور پرتشدد قرار دے رہے ہیں، جبکہ بعض افراد ان کے اس عمل کو “فطری انسانی ردِعمل” کہہ کر ان کی حمایت کر رہے ہیں۔ اس واقعے نے کنسرٹ کے دوران سیکیورٹی کی ناکامی پر بھی سوالات اٹھا دیے ہیں، خاص طور پر اس بات پر کہ ایسی اشیاء ہجوم کے اندر کیسے آئیں اور ان پر فوری ردعمل کیوں نہ دیا گیا۔

تاحال طلحہ انجم یا ان کی ٹیم کی جانب سے اس واقعے پر کوئی باضابطہ بیان سامنے نہیں آیا ہے۔ لیکن ویڈیو کے لاکھوں ویوز اور عوامی ردعمل کو دیکھتے ہوئے یہ معاملہ جلد ان کی جانب سے وضاحت یا معذرت کی صورت میں نیا رخ اختیار کر سکتا ہے۔

ایران کے صدر مسعود یزشکیان نے پارلیمنٹ میں اپنے خطاب کے دوران واضح کیا کہ ایران کا ایٹمی ہتھیار بنانے کا کوئی ارادہ نہیں ہے، اور نہ ہی وہ طاقت کے بل پر کسی پر غلبہ حاصل کرنے کی کوشش کر رہا ہے۔ صدر نے کہا کہ ایران جوہری توانائی اور سائنسی تحقیق کے اپنے جائز حق کا بھرپور دفاع کرے گا، اور پرامن مقاصد کے لیے یورینیم کی افزودگی کا عمل جاری رکھے گا۔ انہوں نے اپنے خطاب میں سپریم لیڈر آیت اللہ علی خامنہ ای کے اس فتوے کا بھی ذکر کیا جس میں وسیع پیمانے پر تباہی پھیلانے والے ہتھیاروں کی سختی سے ممانعت کی گئی ہے۔ صدر یزشکیان نے قوم سے اپیل کی کہ موجودہ نازک حالات میں ہر قسم کے اختلافات کو بھلا کر اتحاد و یکجہتی کا مظاہرہ کریں، کیونکہ اسرائیل کی جانب سے جو نسل کش جارحیت کی جا رہی ہے، اس کے خلاف ایک آواز ہو کر کھڑا ہونا ناگزیر ہے۔ ایرانی صدر نے اسرائیل پر سخت تنقید کرتے ہوئے کہا کہ صیہونی ریاست ایک ایک کرکے مسلمان ممالک کو نشانہ بنا رہی ہے، اور امریکہ کی جانب سے اسرائیل کی حمایت دراصل “غنڈہ گردی” کے مترادف ہے۔ ان کا کہنا تھا کہ اگر ایک ایرانی شہید ہوگا تو اس کی جگہ لینے کے لیے سو افراد کھڑے ہوں گے، اور اسرائیل طاقت کے زور سے ایران کو ختم نہیں کر سکتا۔