وفاقی بجٹ 2025-26: تنخواہ دار طبقے کے لیے ریلیف، بجلی سستی کرنے کی خوشخبری

اسلام آباد:
وفاقی بجٹ میں تنخواہ دار طبقے کے لیے خوشخبری ہے، کیونکہ حکومت نے بجلی کی قیمتوں میں مزید کمی کرنے کا وعدہ بھی کیا ہے۔

وفاقی وزیر خزانہ نے بجٹ 2025-26 میں تنخواہ دار طبقے کو ریلیف دینے کی خوشخبری سنائی۔ انہوں نے یہ بھی بتایا کہ بجلی کے بلوں میں جولائی یا اس سے پہلے مزید کمی پر کام جاری ہے، اور اس سلسلے میں آئی ایم ایف کے ساتھ رابطے میں ہیں۔

وزیر خزانہ محمد اورنگزیب نے کہا کہ آئی ایم ایف کا ایگزیکٹو بورڈ مئی میں اسٹاف لیول معاہدے کی منظوری دے گا۔ تنخواہ دار طبقے کو ریلیف دینے کا مکمل منصوبہ تیار کر لیا گیا ہے، جسے آئی ایم ایف کو بھی دکھایا جائے گا۔

انہوں نے مزید کہا کہ آئی ایم ایف کے تمام اہداف پورے کر دیے گئے ہیں۔ اگرچہ کچھ اہداف میں تھوڑی تاخیر ہوئی، لیکن وہ بھی مکمل کر لیے گئے ہیں۔ انہوں نے یہ بھی بتایا کہ پاکستان کو ایک ارب ڈالر کی اگلی قسط اور ماحولیاتی مالیات کے تحت بھی فنڈز ملیں گے۔

وزیر خزانہ نے کہا کہ بجٹ کی تیاری کے لیے سرکاری اور نجی شعبے سے 98 فیصد تجاویز موصول ہو چکی ہیں، جن پر حکومت اور نجی شعبہ مل کر کام کر رہے ہیں۔ بجٹ کو اسمبلی میں پیش کرنے سے پہلے متعلقہ شعبوں کو آگاہ کر دیا جائے گا کہ کون سی تجاویز پر عمل درآمد ممکن ہے اور جن پر عمل نہیں ہو سکا، ان کی وجوہات بھی بتائی جائیں گی۔

انہوں نے کہا کہ یکم جولائی سے بجٹ حتمی شکل اختیار کر لے گا۔