وزیراعظم شہباز شریف نے اس سال حکام کو ہدایت کی ہے کہ وہ رمضان پیکیج کو یوٹیلٹی سٹورز کے بغیر لائیں۔ وفاقی کابینہ کے اجلاس میں انہوں نے کہا کہ رمضان قریب ہے، اس لیے وزارت فوڈ سکیورٹی کو یہ ہدایت دی گئی ہے کہ وہ یوٹیلٹی سٹورز کے بغیر رمضان پیکیج تیار کریں تاکہ کرپشن اور خراب مال کی فروخت سے بچا جا سکے۔ انہوں نے مزید کہا کہ میں نے کئی ماہ پہلے یہ بات کہی تھی کہ یوٹیلٹی سٹورز کے ساتھ یہ معاملہ اب نہیں چل سکتا، کیونکہ گزشتہ سال رمضان میں ان کے بارے میں بہت سی شکایات تھیں۔ اس کا حل یہ نکالا گیا ہے کہ رمضان پیکیج کو یوٹیلٹی سٹورز کے بغیر لایا جائے۔

وزیراعظم شہباز شریف نے یہ بھی بتایا کہ جنوری میں مہنگائی کی شرح 9 سال کی کم ترین سطح 2.4 فیصد پر آگئی ہے، جبکہ جنوری 2024ء میں یہ 28.73 فیصد تھی۔ دسمبر 2024ء میں مہنگائی کی شرح 4.1 فیصد تک کم ہوئی، جو کہ خوش آئند ہے۔ اب ہماری کوشش ہے کہ ہم معاشی ترقی کی طرف بڑھیں، اور اس کے لیے تمام متعلقہ وزارتوں کو پوری توجہ دینی چاہیے۔ ہم اسی سمت میں آگے بڑھیں گے اور یہ ہمارے لیے ایک چیلنج ہے کہ معاشی نمو کو کس طرح بڑھایا جائے۔

انہوں نے کابینہ کے اراکین کو آگاہ کیا کہ سعودی عرب نے ایک سال کی موخر ادائیگی پر 1.2 ارب ڈالر کا تیل درآمد کرنے کی سہولت فراہم کی ہے۔

سپریم کورٹ کے آئینی بینچ کے سربراہ جسٹس امین الدین خان نے سویلین کے ملٹری ٹرائل کے خلاف انٹرا کورٹ اپیل کی سماعت کے دوران کہا ہے کہ قانون کے غلط استعمال کی بنیاد پر اسے کالعدم قرار نہیں دیا جا سکتا۔ اگر ایک جرم فوجی کرتا ہے اور وہی جرم عام آدمی بھی کرتا ہے تو ان کے ٹرائلز کو الگ جگہ پر کیسے رکھا جا سکتا ہے؟ جسٹس امین الدین خان کی سربراہی میں 7 رکنی آئینی بینچ نے فوجی عدالتوں میں سویلینز کے ٹرائل سے متعلق انٹرا کورٹ اپیل کی سماعت کی۔

سماعت کے دوران سزا یافتہ ارزم جنید کے وکیل سلمان اکرم راجہ نے عدالت میں اپنے دلائل پیش کرتے ہوئے کہا کہ ایف بی علی کیس میں انیس سو باسٹھ کے آئین کے تحت فیصلہ کیا گیا۔ جسٹس جمال مندو خیل نے پوچھا کہ آرمی ایکٹ کے تحت فوجی عدالتوں کے کیا اختیارات ہیں؟ کیا کوئی شخص جو فوج کا حصہ نہیں ہے، صرف جرم کی بنیاد پر فوجی عدالت کے دائرہ کار میں آ سکتا ہے؟ سلمان اکرم راجہ نے کہا کہ ایف بی علی کیس میں بھی یہ بات واضح کی گئی تھی کہ سویلنز کا ٹرائل بنیادی حقوق کی تکمیل کی بنیاد پر ہی ممکن ہے۔

جسٹس محمد علی مظہر نے پوچھا کہ ایف بی علی خود بھی ایک سویلین تھے، تو ان کا کورٹ مارشل کیسے ہوا؟ سلمان اکرم راجہ نے جواب دیا کہ عدالت نے یہ فیصلہ کیا تھا کہ ٹرائل میں بنیادی حقوق کی فراہمی ضروری ہے اور اس میں بنیادی حقوق کی خلاف ورزی نہیں ہونی چاہیے۔