امریکا کے سابق صدر جمی کارٹر سو سال کی عمر میں انتقال کر گئے۔

خبر رساں اداروں کے مطابق، جمی کارٹر 1977 سے 1981 تک امریکا کے صدر رہے اور ان کا تعلق ڈیموکریٹک پارٹی سے تھا۔

جمی کارٹر نے امن کا نوبیل انعام بھی حاصل کیا، اور صدارت کے بعد انسانی حقوق کے لیے کام کیا۔

امریکا کے سابق صدر جمی کارٹر یکم اکتوبر 1924 کو ریاست جارجیا کے شہر پلینز میں پیدا ہوئے، جہاں انہوں نے اپنا بچپن جورجیا کے شہر آرچری میں گزارا۔

انہوں نے 1946ء میں امریکی نیول اکیڈمی سے گریجویشن کی اور اس کے بعد امریکی بحریہ میں ملازمت اختیار کی، جہاں وہ ایک آبدوز میں کام کرتے رہے۔

بحریہ سے ریٹائرمنٹ کے بعد، جمی کارٹر نے سیاست میں قدم رکھا۔ انہوں نے ریاست جورجیا کی قانون ساز اسمبلی کی نشست جیتی اور پھر 1971ء میں ریاست جورجیا کے گورنر کا انتخاب بھی جیت لیا۔

دسمبر 1974 میں انہوں نے اگلے صدارتی انتخاب میں حصہ لینے کا اعلان کیا اور 1976ء میں یہ انتخاب بھی جیت لیا۔

جمی کارٹر کے دور میں مصر اور اسرائیل کے درمیان مشہور کیمپ ڈیوڈ سمجھوتے پر دستخط ہوئے، جس کے تحت مصر نے اسرائیل کو تسلیم کیا جبکہ اسرائیل نے جزیرہ نما سینائی کا مقبوضہ علاقہ مصر کے حوالے کیا۔

جمی کارٹر نے شاہ ایران کی حمایت کی، لیکن ایران میں انقلاب کے بعد امریکا اور ایران کے تعلقات خراب ہو گئے۔