وزیراعلیٰ پنجاب مریم نواز شریف نے صوبے بھر میں تجاوزات کے خاتمے کے لیے ایک ہفتے کی ڈیڈ لائن دی ہے اور ڈپٹی کمشنرز کو کرپشن کے خلاف مؤثر کریک ڈاؤن کرنے کے ساتھ ساتھ بہتر انتظامی نظام ڈیزائن کرنے کا ہدف دیا ہے۔

مریم نواز شریف نے ہر شہر میں سرکاری اراضی پر اربن فاریسٹ بنانے، “نو ٹو پلاسٹک” مہم کو کامیاب بنانے اور میرج ایکٹ کی خلاف ورزی پر زیرو ٹالرنس اپنانے کے احکامات دیے۔ پالتو کتوں کے لیے کالر پہننا لازمی قرار دیا گیا ہے، اور خلاف ورزی پر جرمانہ اور قانونی کارروائی ہوگی۔

وزیراعلیٰ نے سڑکوں پر بائیک لین بنانے اور بائیکرز کے لیے حفاظتی اقدامات (ہیلمٹ، بیک لائٹ اور انڈیکیٹرز) لازمی قرار دینے کی ہدایت کی۔ اسکولوں کے باہر بچوں کے لیے زیبرا کراسنگ اور اسکول وینز کے فٹنس سرٹیفکیٹ پر سختی سے عملدرآمد کا حکم دیا۔

شہری مسائل پر برہمی کا اظہار کرتے ہوئے وزیراعلیٰ نے ہدایت کی کہ سڑکوں پر کھڑے گندے پانی کو فوری طور پر صاف کیا جائے، خیمہ بستیوں کو متبادل مقامات پر منتقل کیا جائے، اور ریڑھی بازار کے لیے منظور شدہ ڈیزائن اور جگہوں پر سختی سے عمل کیا جائے۔

وزیراعلیٰ نے ہر شہر کے بس اسٹینڈز کو ماڈل بنانے، صفائی، پینے کے صاف پانی کی فراہمی، اور آرام دہ نشستوں کا انتظام کرنے کی ہدایت دی۔ انہوں نے تمام شہروں کے لیے سیوریج اور سینیٹیشن کے جامع پلان لانے کا اعلان بھی کیا۔

انہوں نے سرگودھا میں صفائی مہم شروع کرنے اور عوامی شکایات کے فوری ازالے کا حکم دیا۔ تجاوزات کے دوبارہ نظر آنے کو انتظامیہ کی ناکامی قرار دیتے ہوئے انہوں نے سخت ایکشن لینے کی وارننگ دی۔

وزیراعلیٰ مریم نواز شریف نے پبلک پارکس کی بہتری، سالڈ ویسٹ مینجمنٹ کے مؤثر استعمال، سٹریٹ لائٹس کی فعالیت، اور منشیات کے عادی افراد کے خاتمے کے لیے بھی احکامات جاری کیے۔

قومی اسمبلی کے اجلاس میں پاکستان پیپلز پارٹی کے رہنماؤں نے انٹرنیٹ کی سست رفتاری اور بندش پر حکومت کو آڑے ہاتھوں لیا۔

پیپلز پارٹی کی رکن قومی اسمبلی شازیہ مری نے اظہارِ خیال کرتے ہوئے کہا، ’’انٹرنیٹ کی رفتار کا ستیاناس کر دیا گیا ہے۔ وزارتِ آئی ٹی بدحالی کا شکار ہے۔ یہ کون سی فائر وال ہے؟ اس صورتحال میں ڈیجیٹل نیشن پاکستان بل لانے پر مجھے ہنسی آتی ہے۔‘‘

دوسری جانب، پیپلز پارٹی کے ایم این اے عبدالقادر پٹیل نے کہا، ’’انٹرنیٹ کا اتنا برا حال کیوں کیا گیا؟ آئی ٹی سے جڑے لوگوں کا اربوں روپے کا نقصان ہو گیا ہے۔ اتنی بدحالی کسی وزارت میں پہلے کبھی نہیں دیکھی۔‘‘

اس پر پارلیمانی سیکرٹری برائے آئی ٹی ساجد مہدی نے وضاحت دیتے ہوئے کہا، ’’پاکستان میں سکیورٹی مسائل کی وجہ سے وزارتِ داخلہ کی ہدایت پر انٹرنیٹ بند کیا جاتا ہے۔ اس کا وقت بھی وزارتِ داخلہ طے کرتی ہے۔ ہم تب تک کچھ نہیں کر سکتے جب تک وزارتِ داخلہ حالات کو ٹھیک قرار نہ دے۔‘‘

وزیر مملکت برائے انفارمیشن ٹیکنالوجی شزہ فاطمہ خواجہ نے بھی اس معاملے پر بات کرتے ہوئے کہا، ’’انٹرنیٹ بند ہونے سے نہ ہمیں خوشی ہوتی ہے اور نہ کوئی فائدہ۔ ہم نے صوبائی وزرائے داخلہ کے ساتھ مشاورت کر کے صرف ٹارگٹ علاقوں میں انٹرنیٹ بند کیا، پورے ملک کو متاثر نہیں کیا۔ اگر اظہارِ رائے پر پابندی لگانی ہوتی تو ٹک ٹاک اور فیس بک بھی بند ہوتے۔ ہمیں یوزرز کو پیش آنے والی مشکلات پر افسوس ہے اور میں معذرت خواہ ہوں۔