اسلام آباد ہائیکورٹ نے توشہ خانہ ٹو کیس میں پاکستان تحریک انصاف کے بانی عمران خان اور ان کی اہلیہ بشریٰ بی بی کی بریت کی درخواستوں کو جلد سماعت کے لیے مقرر کرنے کا حکم جاری کر دیا ہے۔ جسٹس انعام امین منہاس نے عمران خان کی جانب سے دائر کی گئی متفرق درخواست منظور کرتے ہوئے کہا کہ کیس کو جلد سماعت کے لیے فکس کر دیا جائے گا۔

دوران سماعت وکیل خالد یوسف چوہدری نے عدالت سے درخواست کی کہ کیس کے لیے باقاعدہ سماعت کی تاریخ دی جائے، جس پر جسٹس انعام امین منہاس نے ریمارکس دیے کہ “میں نے آرڈر کر دیا ہے، اب کیس مقرر کر دیا جائے گا۔”

واضح رہے کہ عمران خان اور ان کی اہلیہ نے توشہ خانہ ٹو کیس میں بریت کی درخواستیں دائر کر رکھی ہیں۔ اس سے قبل عمران خان کی جانب سے عدالت میں ایک علیحدہ درخواست بھی دائر کی گئی تھی جس میں توشہ خانہ ٹو کیس کی سماعت بار بار ملتوی ہونے کی وجوہات جاننے کی استدعا کی گئی تھی۔

درخواست میں مؤقف اختیار کیا گیا تھا کہ عمران خان کی غیر موجودگی میں سماعت کا بار بار ملتوی ہونا سنگین معاملہ ہے، اور بغیر کسی قانونی وجہ کے سماعت ملتوی نہیں کی جانی چاہیے۔ مزید یہ کہ کیس کی سماعت اڈیالہ جیل میں مقرر تھی، جسے اچانک جوڈیشل کمپلیکس جی الیون منتقل کر دیا گیا، جو غیر معمولی اقدام ہے۔

درخواست میں عدالت سے یہ بھی کہا گیا تھا کہ سماعت کے مقام میں تبدیلی اور بار بار کی تاخیر سے انصاف کی فراہمی میں رکاوٹ پیدا ہو رہی ہے۔ ساتھ ہی یہ بھی مؤقف اختیار کیا گیا تھا کہ 15 دن سے زائد کا ریمانڈ قانون کے مطابق نہیں دیا جا سکتا، اور عدالت کو تواتر کے ساتھ ملتوی ہونے کی وجوہات بھی بتانی چاہئیں۔

یہ بات بھی قابل ذکر ہے کہ اس کیس کی سماعت 27 فروری اور 11 مارچ کو بھی ملتوی یا منسوخ کی گئی تھی، جس پر عمران خان کے وکلا نے تشویش کا اظہار کیا تھا۔ اب ہائیکورٹ کے حکم کے بعد توقع کی جا رہی ہے کہ کیس کی باقاعدہ سماعت جلد شروع ہو جائے گی۔

صدر مملکت آصف علی زرداری نے کہا ہے کہ پہلگام واقعے کے بعد بھارت کے غیر ذمہ دارانہ اقدامات کے تناظر میں قومی سلامتی کمیٹی کے فیصلے پاکستانی قوم کی امنگوں کی بھرپور ترجمانی کرتے ہیں۔ انہوں نے کہا کہ بھارت کے بے بنیاد الزامات اور غیر منطقی اقدامات کا کوئی جواز نہیں بنتا، اور قومی سلامتی کمیٹی کے تمام فیصلے قوم کے دل کی آواز ہیں۔

ان خیالات کا اظہار صدر آصف علی زرداری نے وفاقی وزیر داخلہ محسن نقوی سے ملاقات کے دوران کیا، جس میں وزیر داخلہ نے انہیں بھارت کے حالیہ اشتعال انگیز اقدامات اور قومی سلامتی کمیٹی کے فیصلوں پر تفصیلی بریفنگ دی۔ صدر نے قومی سلامتی کمیٹی کے بروقت، فوری اور دوراندیش قومی اقدامات کو سراہا۔

صدر نے اس موقع پر کہا کہ پوری قوم سلامتی کمیٹی کے فیصلوں اور اقدامات کے ساتھ کھڑی ہے اور ان فیصلوں سے واضح پیغام گیا ہے کہ پاکستان اپنی خودمختاری اور قومی سلامتی پر کوئی سمجھوتہ نہیں کرے گا۔

وفاقی وزیر داخلہ محسن نقوی نے بھی گفتگو کرتے ہوئے کہا کہ دشمن کسی غلط فہمی میں نہ رہے، پاکستان کا دفاع الحمدللہ ناقابلِ تسخیر ہے۔ انہوں نے مزید کہا کہ بھارت کی جانب سے فالس فلیگ آپریشن کو جواز بنا کر پاکستانی شہریوں کو 48 گھنٹے میں ملک چھوڑنے کا حکم دینا، واہگہ بارڈر کی بندش، اور بھارتی ہائی کمیشن کے ملٹری اتاشی کو وطن واپس بلانے جیسے اقدامات غیر ذمہ دارانہ اور اشتعال انگیز ہیں۔

یاد رہے کہ وزیراعظم شہباز شریف کی زیر صدارت ہونے والے قومی سلامتی کمیٹی کے اہم اجلاس میں بھارت کی آبی جارحیت اور دیگر دشمنانہ اقدامات کا مؤثر اور دو ٹوک جواب دینے کا فیصلہ کیا گیا تھا۔ اجلاس کے اعلامیے میں واضح طور پر بھارت کے ساتھ تمام قسم کی زمینی تجارت بند کرنے، بھارتی طیاروں کے لیے فضائی حدود کی بندش، اور شملہ سمیت تمام دوطرفہ معاہدوں کی معطلی کا اعلان کیا گیا تھا۔

ساتھ ہی بھارتی ہائی کمیشن میں تعینات سفارتی عملے کی تعداد کو 30 افراد تک محدود کر دیا گیا، جبکہ بھارتی دفاعی، فضائی اور بحری مشیروں کو ناپسندیدہ قرار دے کر ملک چھوڑنے کا حکم بھی جاری کیا گیا۔ ان اقدامات کا مقصد واضح پیغام دینا ہے کہ پاکستان اپنی قومی سلامتی، خودمختاری اور پانی جیسے اہم قومی مفاد پر کسی بھی صورت میں سمجھوتہ نہیں کرے گا۔