قطر کی وزارتِ خارجہ نے پاکستان اور افغانستان کے درمیان جنگ بندی سے متعلق اپنے سرکاری بیان میں ایک اہم تبدیلی کرتے ہوئے “سرحد” یعنی بارڈر کا لفظ حذف کر دیا، جس نے سفارتی سطح پر نئی بحث کو جنم دیا ہے۔ عالمی میڈیا کے مطابق ابتدائی بیان میں کہا گیا تھا کہ جنگ بندی دونوں برادر ممالک کے درمیان سرحدی کشیدگی کو کم کرنے میں مدد دے سکتی ہے، تاہم بعد میں جاری کردہ تازہ بیان میں صرف “دونوں برادر ممالک کے درمیان کشیدگی” کا ذکر کیا گیا، اور “سرحد” کا لفظ ہٹا دیا گیا۔

ماہرین کے مطابق قطر کا یہ اقدام سفارتی لحاظ سے محتاط پالیسی کی عکاسی کرتا ہے، کیونکہ افغانستان تاریخی طور پر ڈیورنڈ لائن کو بین الاقوامی سرحد کے طور پر تسلیم کرنے سے انکار کرتا رہا ہے۔ دوسری جانب پاکستان ہمیشہ سے اس لائن کو اپنی باضابطہ سرحد مانتا آیا ہے۔ سوشل میڈیا پر بڑھتی تنقید کے بعد قطر نے بیان کو اپ ڈیٹ کیا تاکہ وہ کسی ایک فریق کے مؤقف کی حمایت کرتا محسوس نہ ہو۔

قطر نے امید ظاہر کی ہے کہ یہ جنگ بندی دونوں ممالک کے درمیان پائیدار امن کے لیے ایک مضبوط بنیاد ثابت ہوگی۔ افغان وزیرِ دفاع محمد یعقوب مجاہد نے واضح کیا کہ دوحہ مذاکرات میں ڈیورنڈ لائن پر کوئی بات نہیں ہوئی اور اسے ایک “خیالی سرحد” قرار دیا۔ سابق افغان نائب صدر امراللہ صالح نے دعویٰ کیا کہ عوامی دباؤ کے باعث قطر نے لفظ “بارڈر” ہٹایا۔

یہ واقعہ اس وقت پیش آیا جب پاکستان اور افغانستان کے درمیان سرحدی کشیدگی میں اضافہ دیکھا جا رہا ہے، خصوصاً چمن اور طورخم کے علاقوں میں۔ قطر کا کردار ایک ثالث ملک کے طور پر ابھر رہا ہے جو خطے میں امن و استحکام کے لیے کوششیں کر رہا ہے۔

عشرت فاطمہ خیریت— پی ٹی وی کے سنہری دور کی معروف نیوز کاسٹر عشرت فاطمہ الحمد للہ بالکل خیریت سے ہیں اور اپنی روزمرہ کی سرگرمیوں میں مصروف ہیں۔

حالیہ دنوں سوشل میڈیا پر ان کے انتقال سے متعلق جھوٹی خبریں تیزی سے وائرل ہو گئیں، جنہوں نے نہ صرف دنیا بھر میں موجود ان کے مداحوں بلکہ قریبی رشتہ داروں کو بھی تشویش میں مبتلا کر دیا۔ ان افواہوں پر خود عشرت فاطمہ بھی حیران رہ گئیں اور انہیں اپنی خیریت کے بارے میں عوام کو آگاہ کرنے کے لیے ویڈیو پیغام جاری کرنا پڑا۔

معروف میزبان توثیق حیدر کے ساتھ ویڈیو کال میں گفتگو کرتے ہوئے عشرت فاطمہ نے مسکراتے ہوئے کہا کہ “میں ابھی ابھی ریڈیو پروگرام کر کے آئی ہوں، اور آج تو میرے پاس لحاف دھونے جیسے ڈھیروں گھریلو کام بھی پڑے ہیں۔” ان کے پُر اعتماد لہجے اور مزاحیہ انداز نے مداحوں کے چہروں پر مسکراہٹ بکھیر دی۔

انہوں نے مزید کہا کہ “لوگ صرف صحت کے ساتھ لمبی زندگی کی نہیں بلکہ عزت اور وقار کے ساتھ بقا کی دعا بھی کریں۔” ان کے اس ہلکے پھلکے پیغام نے تمام افواہوں کا خاتمہ کر دیا اور ان کے چاہنے والوں نے سوشل میڈیا پر اطمینان کا اظہار کیا۔

عشرت فاطمہ نے اپنے کیریئر کا آغاز ریڈیو پاکستان سے کیا، جہاں وہ پروگرام کھیل اور کھلاڑی کی میزبانی کرتی تھیں۔ ان کی پختہ اردو، پُرسکون لہجہ اور اعتماد بھری آواز نے انہیں پی ٹی وی کے نو بجے کے خبرنامے کی مقبول ترین آواز بنا دیا۔ وہ ہر گھر میں اعتماد، وقار اور پروفیشنلزم کی علامت سمجھی جاتی تھیں۔