کراچی — پاکستان اسٹاک ایکسچینج نے کاروباری ہفتے کے آغاز پر ایک اور تاریخی سنگ میل عبور کرلیا، جہاں 100 انڈیکس نئی بلند ترین سطح پر پہنچ گیا۔ پیر کے روز سرمایہ کاروں کی بھرپور دلچسپی اور مارکیٹ میں مثبت رجحانات کے باعث کے ایس ای 100 انڈیکس میں کاروبار کا آغاز 691 پوائنٹس کی تیزی سے ہوا، جس کے بعد انڈیکس 154,969 پوائنٹس کی سطح پر پہنچا۔

پاکستان اسٹاک ایکسچینج کا مثبت رجحان برقرار رہا اور بتدریج مزید تیزی آئی، جس کے نتیجے میں انڈیکس میں مجموعی طور پر 1692 پوائنٹس کا نمایاں اضافہ ریکارڈ کیا گیا اور یوں انڈیکس 155,969 پوائنٹس کی نئی تاریخ ساز بلند ترین سطح تک جا پہنچا۔ یہ مسلسل دوسرا موقع ہے جب اسٹاک مارکیٹ نے نئے ریکارڈز قائم کیے، کیونکہ گزشتہ کاروباری ہفتے کے اختتام پر بھی انڈیکس 154,000 پوائنٹس کی حد عبور کر چکا تھا۔

ماہرین کے مطابق یہ اضافہ سرمایہ کاروں کے اعتماد، معاشی اشاریوں میں بہتری اور ملکی مالیاتی پالیسیوں میں استحکام کی نشاندہی کرتا ہے۔

پاکستان پیپلز پارٹی کے چیئرمین بلاول بھٹو زرداری نے سیلاب کی تباہ کاریوں کے پیش نظر ملک میں فوری طور پر زرعی ایمرجنسی نافذ کرنے کا مطالبہ کرتے ہوئے کہا ہے کہ کسانوں کو بیج اور کھاد مفت یا آسان اقساط پر فراہم کی جائے تاکہ وہ اس مشکل وقت میں اپنی زمینوں کو دوبارہ قابلِ کاشت بنا سکیں۔ مظفر گڑھ میں میڈیا سے گفتگو کرتے ہوئے بلاول بھٹو نے کہا کہ انہوں نے حالیہ دنوں میں لاہور، قصور اور ملتان کا دورہ کیا ہے، اور ان کے مشاہدے کے مطابق سیلاب سے سب سے زیادہ نقصان پنجاب کے کسانوں کو ہوا ہے، خصوصاً جنوبی پنجاب کے عوام شدید متاثر ہوئے ہیں۔

انہوں نے کہا کہ ہر قدرتی آفت میں تین مراحل ہوتے ہیں: ریسکیو، ریلیف اور بحالی۔ اس وقت پاکستان کو ان تمام مراحل سے گزرنے کی ضرورت ہے۔ بلاول نے کہا کہ وزیراعظم سے درخواست کی ہے کہ بینظیر انکم سپورٹ پروگرام (بی آئی ایس پی) کے ذریعے متاثرہ خاندانوں کی فوری مالی مدد کی جائے جیسا کہ ماضی میں بھی کیا گیا تھا۔ ان کا کہنا تھا کہ سیلابی پانی اب سندھ کی طرف بھی بڑھ رہا ہے، اس لیے فوری اقدامات نہ کیے گئے تو نقصان مزید بڑھ سکتا ہے۔

بلاول بھٹو نے تجویز دی کہ جب تک سیلابی صورتحال برقرار ہے، متاثرہ کسانوں کے بجلی کے بل بھی معاف کیے جائیں۔ انہوں نے کہا کہ گزشتہ سیلاب کے دوران بطور وزیر خارجہ انہوں نے سیلاب زدگان کے لیے نئے گھروں کا منصوبہ دیا تھا، اب بھی اسی طرز پر اقدامات کی ضرورت ہے۔ بلاول نے حکومت، اپوزیشن اور تمام اداروں سے مطالبہ کیا کہ وہ سیاست کو ایک طرف رکھ کر متاثرین کی مدد کو اولین ترجیح دیں۔

انہوں نے اقوام متحدہ اور دیگر عالمی اداروں سے بھی اپیل کی کہ وہ پاکستان کے سیلاب متاثرین کی مدد کے لیے فوری اقدامات کریں اور عالمی سطح پر اس انسانی بحران کو اجاگر کیا جائے۔ ان کا کہنا تھا کہ اگر ہم اس وقت آواز نہ اٹھائیں تو دیر ہو جائے گی۔

چیئرمین پیپلز پارٹی نے کہا کہ حکومت کے پاس بی آئی ایس پی جیسا مؤثر ذریعہ موجود ہے جس کے ذریعے متاثرین تک فوری مدد پہنچائی جا سکتی ہے۔ اس کے علاوہ پبلک پرائیویٹ شراکت داری سے بھی ریلیف کا دائرہ وسیع کیا جا سکتا ہے۔ آخر میں انہوں نے کہا کہ وہ ان دنوں صرف سیلاب متاثرہ علاقوں کے دورے کر رہے ہیں اور ان کا مقصد صرف اور صرف متاثرہ عوام کی مدد کو یقینی بنانا ہے، نہ کہ سیاسی پوائنٹ اسکورنگ۔