وزیراعظم شہباز شریف نے کہا ہے کہ پاکستان، افغانستان اور ازبکستان کو ملانے والی مجوزہ ریلوے لائن سے خطے میں تجارت کا ایک نیا اور انقلابی دور شروع ہونے جا رہا ہے، جس کے تحت وسطی ایشیاء سے تجارتی سامان پاکستانی بندرگاہوں کے ذریعے دنیا بھر میں منتقل ہوگا۔ ان خیالات کا اظہار وزیراعظم شہباز شریف نے شپنگ سیکٹر اور پاکستان نیشنل شپنگ کارپوریشن (PNSC) کی اصلاحات سے متعلق ایک اعلیٰ سطحی اجلاس کی صدارت کرتے ہوئے کیا۔ اجلاس میں نائب وزیراعظم و وزیر خارجہ اسحاق ڈار، وفاقی وزرا احد چیمہ، جنید انور چوہدری اور دیگر متعلقہ اعلیٰ حکام نے شرکت کی۔ وزیراعظم نے ہدایت دی کہ شپنگ سیکٹر میں نجی شعبے کی سرمایہ کاری کو فروغ دینے کے لیے جامع حکمت عملی مرتب کی جائے اور نیشنل شپنگ کارپوریشن کو کارپوریٹ بنیادوں پر مستحکم کرنے کے فوری اقدامات کیے جائیں تاکہ شفافیت اور استعداد میں اضافہ ہو۔ انہوں نے اس بات پر زور دیا کہ ریلوے اور شپنگ شعبے کی بہتری ٹرانزٹ ٹریڈ کے فروغ کے لیے کلیدی حیثیت رکھتی ہے، اور پاکستانی شپنگ لائنز کے ذریعے سامان کی ترسیل ملک کے لیے قیمتی زرمبادلہ کمانے کا ایک نادر موقع فراہم کرتی ہے۔ وزیراعظم نے مزید ہدایت کی کہ فریٹ پر خرچ ہونے والے زر مبادلہ کی بچت کے لیے ملکی بحری بیڑے میں جہازوں کی تعداد میں اضافہ کیا جائے۔ انہوں نے وزارتِ بحری امور اور پاکستان نیشنل شپنگ کارپوریشن کو بھی ہدایت دی کہ شعبے کی از سر نو اصلاحات کے لیے پائیدار بزنس ماڈل پیش کریں تاکہ شپنگ سیکٹر قومی معیشت میں اپنا مؤثر اور فعال کردار ادا کر سکے۔