پنجاب حکومت نے مالی سال 2025-26 کے لیے 5335 ارب روپے کا ٹیکس فری بجٹ پیش کر دیا ہے، جس میں سرکاری ملازمین کی تنخواہوں میں 10 فیصد اور ریٹائرڈ ملازمین کی پنشن میں 5 فیصد اضافہ کیا گیا ہے۔ پنجاب اسمبلی کے بجٹ اجلاس کی صدارت اسپیکر ملک محمد احمد خان نے کی، جب کہ وزیر خزانہ مجتبیٰ شجاع الرحمان نے بجٹ پیش کیا۔ اجلاس کے دوران اپوزیشن کی شدید ہنگامہ آرائی، نعرے بازی اور شور شرابہ بھی دیکھنے میں آیا، یہاں تک کہ ایجنڈے کی کاپیاں پھاڑ کر اسپیکر اور وزیر خزانہ پر پھینکی گئیں۔

وزیر خزانہ نے اپنی تقریر میں اعلان کیا کہ یہ بجٹ گزشتہ سال کی طرح مکمل طور پر ٹیکس فری ہے اور کسی نئے ٹیکس کا نفاذ نہیں کیا جائے گا، البتہ موجودہ ٹیکسوں کی وصولی کو بہتر بنایا جائے گا۔ انہوں نے بھارت کے خلاف پاکستانی فوج کی فتح پر وزیراعظم، افواج اور فیلڈ مارشل عاصم منیر کو خراجِ تحسین پیش کیا اور وزیراعلیٰ پنجاب مریم نواز کی قیادت کو بھی سراہا۔

بجٹ کے اہم نکات میں شامل ہے کہ تعلیم کے لیے 811.8 ارب روپے (21.2 فیصد اضافہ)، صحت کے لیے 630.5 ارب روپے (17 فیصد اضافہ)، اور زراعت کے لیے 129.5 ارب روپے مختص کیے گئے ہیں۔ ترقیاتی بجٹ 1240 ارب روپے اور غیر ترقیاتی بجٹ 4000 ارب روپے رکھا گیا ہے۔

بجٹ میں روڈ سیکٹر کے لیے 120 ارب، صحت و بہبود آبادی کے لیے 90 ارب، زراعت کے لیے 80 ارب، محکمہ بلدیات کے ترقیاتی منصوبوں کے لیے 142 ارب اور اربن ڈویلپمنٹ کے لیے 145 ارب روپے مختص کیے گئے ہیں۔ سکل ڈویلپمنٹ کے لیے 12 ارب، آئی ٹی سیکٹر کے لیے 35 ارب، اور ٹرانسپورٹ کے لیے 85 ارب روپے کی تجاویز شامل ہیں۔

پنجاب کا اپنا ریونیو ہدف 828.1 ارب روپے رکھا گیا ہے، جس میں ٹیکس آمدن کا ہدف 524.7 ارب اور نان ٹیکس آمدن 303.4 ارب روپے ہے۔ پنجاب بورڈ آف ریونیو کا ہدف 105 ارب اور پنجاب ریونیو اتھارٹی کا ہدف 340 ارب روپے مقرر کیا گیا ہے، جب کہ اربن امویبل پراپرٹی ٹیکس کا ہدف 32.5 ارب روپے ہوگا۔

مزید برآں، اسکول ایجوکیشن کی اسکیموں کے لیے 100 ارب، ہائر ایجوکیشن کے لیے 39.5 ارب، اسپیشل ایجوکیشن کے لیے 5 ارب، لٹریسی اینڈ نان فارمل ایجوکیشن کے لیے 4 ارب، واٹر سپلائی و سینیٹیشن کے لیے 6 ارب اور سوشل ویلفیئر کے لیے 7 ارب روپے مختص کیے گئے ہیں۔ بجٹ میں 3132 نئی اسکیمیں شامل کی گئی ہیں، جو صوبے کی ترقی اور عوامی فلاح کے لیے اہم سنگِ میل ثابت ہوں گی۔